上海滩的浜、湾、桥

　　文/沈锡伦

　　上海本生是一个小县城，清朝辰光，县城垃拉现在个中华路人民路组成个环城河里向，城外只有小东门外、十六铺一带、黄浦江边浪向还比较闹猛，别个地方还是乡下头个样子。上海地处江南水乡，城里城外河浜邪气多，虽然讲后来城市繁华起来了，交关河浜侪填脱了，但是留下来“浜”个地名、路名还是见证了上海个历史面貌。

　　喏，侬看，从南浦大桥下头个陆家浜路朝西（经过徐家汇路），接牢肇嘉浜路，再过去接牢蒲汇塘（今漕溪北路），从“浜”“塘”个名字来看，说明搿几条马路老早仔侪是河浜，后来填浜成路了。老城厢里向还有方浜（今方浜东、中、西路）、侯家浜（今侯家路），再远一点个有薛家浜路、南塘浜路、诸安浜路、横浜路咾啥【等等】，现在搿牌里个【这种】河浜侪呒没了。有种介【有些】河浜填脱以后从路名已经看勿出伊拉老早是河浜了，譬方讲洋泾浜，本生是英租界搭仔法租界个界河，从外滩到现在大世界个地方，北面是英租界，南面是法租界，填脱以后叫爱多亚路，现在叫延安东路。泥城浜，从苏州河朝南一直到陆家浜（斜桥），填脱以后叫虞洽卿路，就是现在个西藏中路、西藏南路（部分）搭仔肇周路。

　　乡下头个河浜勿大会是笔笃直个，总归有眼【有点儿】弯弯曲曲个，垃拉河浜打弯个地方就会留下来“xx湾”个地名，像上海本生有个卢湾区，现在是新黄浦区个一部分。伊叫卢湾区是得名于卢家湾，肇嘉浜朝东流过了打浦桥朝北弯了一弯再朝东，东接陆家浜，迭个打弯个地方就叫卢家湾。阿拉小辰光有一条2路有轨电车，就是从十六铺开到卢家湾个。再看唐家湾，伊靠近老西门，搭泥城浜也有关系，泥城浜北起苏州河（今泥城桥处），南接陆家浜，垃拉现在西藏南路转到肇周路的地方弯了两弯，我猜想附近姓唐个人家比较多，所以叫唐家湾。还有土山湾，垃拉现在个漕溪北路蒲汇塘路附近，清朝末年，当地疏浚蒲汇塘，挖出来个烂污泥就堆垃拉河浜边浪向，形成一座小土山，加上蒲汇塘又不是笔笃直个，有一点弯势，所以就留下来一个土山湾个地名。

　　要讲到桥，河浜多桥就多，老早仔上海个桥实在是行【hhang】情行事【非常多】，随着河浜个填脱，有交关桥是“只闻桥名，勿见桥影”。像提篮桥、八仙桥、南洋桥（今西藏南路自忠路附近）、斜桥，肇嘉浜路上头个打浦桥、大木桥、小木桥、枫林桥、东庙桥（东安路老早叫东庙路）、谨记桥（宛平南路老早叫谨记路）、天钥桥，延安东路上头个郑家木桥（福建路口）、东新桥（浙江路口）、西新桥（广西路口）。再远一眼的地方还有虹桥、杨家桥（今同济大学沪西校区附近），浦东还有塘桥、金桥老啥，介许多桥阿是数也数勿过来。

　　地名是历史个一面镜子，侬要欢喜上海，就要晓得上海个历史变迁，侬讲对伐？