老早“甜爱路”勿浪漫

　　文/宜青

　　“甜爱路”是一条紧贴鲁迅公园东边，南北走向个小马路，现在伊个名气老响个，特别是年轻个情侣们，拿伊看成为一条圣洁个“爱情之路”，有交关人还特地到搿搭来探访、体验，或者专门到搿搭约，牵手依偎，从路头散步到路底，甚至会来来回回而流连忘返。

　　追溯搿条取名特别个马路个来历，还得从老上海个租界时期讲起。最初公共租界工部局垃拉今朝武进路附件建造了一个靶子场，供万国商团搭外国侨民打靶训练和取乐，但以后搿搭城市化了，人口也逐渐多了，乃末只得撤离。垃拉清光绪二十二年（1896年）远迁到了当时还是农田、荒地相间个现在个四川北路底。五年以后，工部局又决定垃拉靶子场个西边开阔之地，兴建一个以体育活动与娱乐为主个大型绿化公园。园内个体育设施有网球场、曲棍球场、板球场、高尔夫球场、草地滚球场、足球场等（有常时还经常垃拉此地举行运动会），也因为迭能，迭个公园初名叫“新娱乐场”、“虹口游乐场”，一直到1922年垃拉地域扩充后才改名为“虹口公园”。不过，太平洋战争爆发后，搿一带完全拨拉日伪当局占领，公园个体育、娱乐功能萎缩，打靶停止，场地改作了堆栈仓库搭做杂用。当抗战胜利以后，公园（曾改名为中正公园）依然存在，但打靶场却完全废弃了。抗战结束后，从北四川路（即今四川北路）斜向向靶子场东，已开辟有一路，搿条路就是今朝个甜爱路个南段（从今四川北路口到今甜爱支路），当时路名为“甜安路”。解放以后，1950年从公园划地筹建虹口体育场，同时靶子场正式扩充并入公园。也就垃拉搿个辰光，原先靶子场东边本来就有个一条南北向小道，拨拉开辟以外，与南边个甜安路打通连接起来。两路合并，总归要有一个新名。因道路南段东侧有建于1928年个大型新式里弄“千爱里”，乃末各取“甜”、 “爱”两字，全路定名为“甜爱路”了。

　　甜爱路宽仅七八米，旧时并勿起眼，更谈勿上浪漫了。一是垃拉搿一带，四川北路是苏州河北个大通道，以往南来北往车水马龙侪过搿条马路，去白相虹口公园（现为鲁迅公园）也是必行搿个主干道；二是甜爱路虽长700多米，却是一条断头路，即其北端是死路，不对外通连；三是东边千爱里、大陆新村等居民点，主出入口都勿垃搿条路，而位于东边个山阴路浪，居民往来多是从山阴路进出。由于迭些种种原因，所以甜爱路上经常是冷冷清清、行人稀少，尤其是到了夜到，路灯昏黄，冷落寂寥，一般大家勿会走搿条路，老早经过搿条路个行人走垃拉路浪，也不免真还有点心慌呢。

　　近十多年来，搿条小马路也闹猛起来，南段成了多路公交车辆个停靠站，北段虹口公园则开了两个东便门。而最重要个是，改革开放以后，地名文化也成了社会资源搭旅游资源，因为路名后面有历史、有故事，所以自然而然个引起了大家个关心，其文化价值于是被广泛地开发、调动了起来。垃拉上海，像甜爱路迭能个名称，自然更容易拨拉社会注意，故它终于凸显地进入了时尚青年男女的视野，得到了他（她）们的热爱和追捧。再经媒体个推波助澜炒作及地方政府有心着意个打造（现虹口政府在路南段特地做了28面包含中外著名爱情诗的“诗墙”），搿条甜爱路逐渐垃拉上海几千条个马路名称中脱颖而出，虽仍旧是一条小马路，但今朝却闪耀出非同一般个浪漫，还能令人产生无限想象个浪漫色彩了。其实，老早甜爱路搭爱情一眼呒没关系。