文/冯济民
老早上海人坐火车基本侪是到天目路、宝山路个北火车站,伊也叫老北站。
老北站,老早辣辣上海实在忒有名了,伊个名气早已超出铁路、超出上海。搿是因为,老北站搭中国历史上个交关重大历史事件紧密联系辣辣一道个。老北站就像一个阅历深厚个历史老人,见证了一个个历史瞬间。
火车是当时上海到南京最先进、快捷个交通工具。因为民国个一段辰光,南京是中国个首都,所以南京到上海个铁路就叫做“京沪铁路”。1912年1月1日,孙中山先生就是从搿搭乘火车去南京就任临时大总统,搿个已经定格成为永恒。现在辣辣上海铁路博物馆里还陈列有一张巨幅照片。照片上孙中山先生立辣老北站个月台上,旁边是全副武装个新军,搿个场面可谓豪情万丈、气贯长虹。后来只不过隔了一年,同样辣辣老北站,国民党领袖宋教仁就拨袁世凯派人刺杀了。共和之梦就此破碎,宋教仁被刺,甚至改变了中国历史个走向。接下来,1921年夏天,中共一大代表就是从老北站乘上了从上海开往杭州个104次快车去嘉兴个。老北站勿知勿觉中帮助中共一大代表从上海转移到浙江嘉兴,辣辣南湖里开完了会议。
上海解放后,老北站焕发了青春,为上海个发展和人民个出行发挥了很大个作用。1966年个夏天,“文革”爆发,当时个老北站成了旗帜个海洋、绿军装个海洋、红袖章个海洋。一趟趟火车满载着各地对理想与信念充满狂热个红卫兵进入老北站,来到上海。上海个红卫兵也像黄浦江个潮水一样向老北站涌去,从搿搭乘火车到北京,到全国各地去“大串联”。搿个辰光坐火车勿要买票,吃饭也勿要付铜钿。
后来上山下乡运动,又有一趟趟火车从老北站拿千千万万知识青年拉到数千公里以外去安家落户,去新疆、去北大荒、去西双版纳。1969年到1972年,是知青上山下乡个高峰期,老北站每天侪上演了一幕幕离别个悲伤场景。火车汽笛一拉响,就像一首忧伤个大合唱开始了领唱,整个月台上哭声震天。
老北站里也留下了我个交关回忆。记得当年我也是从老北站出发到北京去“大串联”。后来我爸爸到贵州支内,弟弟到贵州插队,爱人到江西、安徽插队,也侪是从老北站出发个。我勿晓得辣辣老北站接送过伊拉多少次了。
一晃几十年过去了。老北站也早已失去了功能。原来个一部分候车室现在变成了铁路博物馆。但是对老北站个回忆将永远留辣辣阿拉个记忆里,永远勿会得忘记脱!
版权声明:
• 在本网站刊登的所有内容,包括但不限于文字、图片、音频视频、美术设计、程序及多媒体等信息,未经著作权人合法书面授权,不得进行一切形式的下载、转载或建立镜像。获得著作权人合法书面授权的,必须在授权范围内使用,使用时保留本网注明的“稿件来源”,并自负法律责任。凡注明为其他媒体来源,均为转载自其他媒体,转载并不代表本网赞同其观点,也不代表本网对其真实性负责。如果擅自篡改为“稿件来源:新民网”,本网将依法追究责任。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641111 021-52921234转 新民网 传真:021-62677454
邮箱:稿件处理 处理时间:9:00—18:00