文/金嘉炳
伊日辣超市货架浪,发现陈列着一种盒装酱排骨。酱排骨就是无锡肉骨头个今名,自然是无锡特产了!出产个厂家却是陆稿荐。只晓得无锡三凤桥个酱排骨名气邪气响、酱汁浓郁、口味纯正。勿由得想起上海老早仔个陆稿荐。
以陆稿荐为店名个为数勿少,要讲个搿爿开辣延安东路浪,靠近棋盘街,拳头产品就是酱汁肉!
搿家个酱汁肉实在地道:鮮艳个红色,肉皮油光锃亮,好像涂了一层腊克。拿筷子搛上去,方形个肉块会轻轻抖动。从加工到出售,需要小心翼翼,像服侍一个娇滴滴个小毛头一般,轻悠悠个拨伊从锅中一一搛出,装辣侬自带个家生里向。因为熟食不仅要喫口好,还要讲一个卖相。
酱汁肉呈三精三肥,肥个部份就像豆腐花般个嫩,而精个部位肉质丰腴而不嵌牙,恰到好处,难怪近悦远来,早早就有顾客来排队等开市。另外再买眼百页结,本色个百页结是放辣白汁肉汤里煮好,最灵个是上面浇一勺浓郁个酱汁,搿味道是打耳光也勿肯放个!
据传闻,搿家百年老店有锅老汤,是常年煮沸。想一想,搿锅内积聚了几几化化个肉质精华,故而是越来越赞!至于配方,两个字:秘制!
伊个辰光,黄浦区商肆林立,熟食店远不止一家,近段就有杜五房、杜六房、平五房、马泳斋等等,侪有自家个特色。
喫遍沪上酱汁肉,首推搿家陆稿荐。后来勿晓得搬到啥地方去了,从五十年代到今朝,我仍旧深深个牵记伊!
扫一扫 关注微信“侬好上海”
新民网出品,学上海话,知上海事
回复文字 声音 听上海闲话
版权声明:
• 在本网站刊登的所有内容,包括但不限于文字、图片、音频视频、美术设计、程序及多媒体等信息,未经著作权人合法书面授权,不得进行一切形式的下载、转载或建立镜像。获得著作权人合法书面授权的,必须在授权范围内使用,使用时保留本网注明的“稿件来源”,并自负法律责任。凡注明为其他媒体来源,均为转载自其他媒体,转载并不代表本网赞同其观点,也不代表本网对其真实性负责。如果擅自篡改为“稿件来源:新民网”,本网将依法追究责任。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641111 021-52921234转 新民网 传真:021-62677454
邮箱:稿件处理 处理时间:9:00—18:00