走出上海个上海闲话（二)

　　文/沈锡伦

　　上海闲话里还有勿勿少少个词语进入了普通话。像“噱”，“噱头”“发噱”是形容滑稽好笑，“摆噱头”是指调花枪，用花招来吸引人。“蹩脚”，也好讲推扳，可以指货色质量低劣，也好指一个人个本事勿大。

　　“拆白党”，是旧社会里个一种人，鲁迅先生个文章里常常提到搿种介人，伊拉专门垃拉社会浪向招摇撞骗，骗人家钞票财物。“打烊”，指商店过了营业时间关门停止营业（上海儿歌有“落雨啰，打烊啰，小八辣子开会啰”）。垃拉《现代汉语词典》里，像“噱”“蹩脚”“拆白党”“打烊”搿种介上海闲话个词侪查得着个。

　　新中国的股市是从上海开始个，股市用语有交关也是上海闲话，像股票、基金个计量单位“只”（10只股票、5只基金），就出现垃拉新华社个财经新闻里。“套牢”，买进股票后股价跌下去了，奈末就套牢了（套牢还有脱勿了手个意思），现在全国各地侪搿能讲了。

　　上海闲话形容一个人装模作样、装得来像真个一样叫“像煞有介事”，迪个本生只勿过是上海方言里个用法，现在演变成中国各地全民所有个一个成语“煞有介事”。后来垃《现代汉语词典》浪向又改回到“像煞有介事”。上海闲话形容一个人做事体勿上路，勿光明正大叫“狗屄（bi）倒招”(像“迭个人做事体就是狗屄（bi）倒招，一眼也不上路)，台湾闲话搭上海闲话一样，也是搿能讲个。另外，阿拉上海人讲“打烊”，台湾人也讲“打烊”。