沪语姓氏读音趣谈

　　文/唐位位

　　嵘嵘垃拉节头节脑个辰光，单位里忙得头头转，伊个顶头上司姓龚，今朝帮伊写发言稿，改了一稿又一稿。总算改好了，辰光也勿早了。回到屋里，老公问嵘嵘：“嵘嵘，侬垃拉单位里做啥啦？”

　　“我拉帮阿拉单位个‘老公’写稿子呀。”

　　“㑚单位里个‘老公’？弄到介晏还送侬回来？”

　　听听老公口气勿对，嵘嵘拎清了，立时三刻解释：“老公，我讲个是龚老师呀，伊搿两天烦煞脱了，我写好一稿退一稿，横改竖改。我呒没叫伊龚老师，就叫伊老龚！”“哈哈，侬搿只小戆大！上海闲话讲勿来末覅讲，应该是‘老龚【jiong】’，滑稽演员龚伯康个‘龚’！上来就叫人家‘老公’，要出人性命个呀！那自家老公今朝差眼拨侬气得吐血！”

　　“还好阿拉老公做事体有清头，听得懂，否则，弄勿好要离婚来。”

　　“嘘——老婆，侬跟我发音——龚【jiong】——老龚——……下趟覅读错啊！”……

　　故事中“龚”姓个读音快要失传了。普通话字典上只有一个音：【gong】，而沪语发音应该是【jiong】。依据是《唐韵》：“俱容切”，《集韵》：“居容切”。

　　像“龚”搿能小上海侪勿会读个姓还有勿少。举三例为证：

　　1.“岳飞”的“岳”，勿读“月”，读音同沪语“鹤”；

　　2.“奚美娟”的“奚”，勿读“西”，读音同沪语“夷”；

　　3.“颜真卿”的“颜”，勿读“严”，读音同沪语“眼”。

　　沪人爱沪语，就从抢救濒临失传个姓氏读音做起伐。