上海话走向辉煌——上海话前世今生之三

　　文/钱乃荣

　　170年前1843年11月17日，上海对外开埠，辣辣租界搭原县城、南市、闸北、虹口咾啥地方，繁华个城区老快就形成了，城区个上海话随辣上海个都市化而发生了邪气快个变化。首先是在语汇上个变化。

　　上海成为一个开放之都，大量外籍、外地人口陆续迁进上海，各地个闲话尤其是江浙吴语个生活词汇，撞击了以松江话为基础个上海话当中个生活基础用语。上海话勿拘一格个大量吸收各地有用个词语，词语兼用搭仔借用比较常见，像常用词“一共”集中了“一共、一总、总共、共总、统共、拢共、一共拢总、一齐拉起、一道辣海、一塌刮子、亨八冷打、搁落三姆”交关同义词近义词，搿个会使讲上海话有了多样化个选择，后面三个词就比较生动。“一点点”勿同于“一微微【mi,极小】、一屑屑【如粉状】、一滴滴【dik,如水珠】、一沰沰【dok，较大糊状】，同中有异，表现生活更为细腻。

　　分散搭仔集中，语言是会自动调节得正好个。语言本来就是使用者约定俗成个，约定俗成本身就是优胜劣汰，葛咾近代世界形成个大都市像伦敦、巴黎、纽约、上海，侪是世界浪优化语词个集散地。占上海人口80％以上个全国各地移民陆陆续续来到上海，使得上海话取得了杂交优势。其中一种最常见个演变方式，是使各地方言个公约数词语较快辣上海话当中取胜，举例像上海话个“东半爿【dongbebhe】、东面”、苏州话的“东首、东面”、宁波话的“东半边、东面”，以“东面”取胜；又比方原来上海话个同义词“净、汏”、“安、摆”、“担、拿”、“坍惷【tecong】、难为情”侪以后者取胜，搿个就使上海话最早个摆脱了窄地域性个土语，也使上海话辣辣吴语方言中成为更加有代表性个方言。以后，上海周边城市也慢慢个跟随上海话发生类似个变化。

　　世界浪国际性大都市个语言，侪会吸收各种语言、方言当中个精华，上海话主要从英语当中吸收了大量词语，也从来到上海个移民当中吸取有特色个词语，像苏州话个“标致、淴浴、吃家生、啥叫啥、跌跟跺、一只顶”，宁波话个“阿拉、高头、窗门、碗盏”，杭州话个“莫老老、扒儿手”，苏北话个“小把戏、乖乖弄底冬”咾啥。

　　从晚清起上海人衣食住行发生了大变化，从西方传来了大量个新事物、新观念。老上海人搭移民一道，主要是以宽阔个胸怀，看见一样新鲜物事，就造一个新词。辣上海都市化进程当中，像“马路、洋房、自来水、自来火、电灯泡、电线、书局、报馆、编辑部、影戏院、公司、商会、会馆、同乡会、救火会、孤儿院、自鸣钟、夜光表、寒暑表、牙刷、橡皮筋、粉笔、铅笔、笔记簿、画报、口琴、明星、操场、篮球、高尔夫球、照相、软片、雪花膏、花露水、水果糖”，新名词辣上海话里向澎湃涌出，遍地开花。