汇江南风味于一炉——上海话前世今生之五

　　文/钱乃荣

　　上海辣辣都市化个进程当中，汇集了全国各地个民俗文化，尤其是苏浙徽个江南民俗，本来江南地方就是经济文化繁华之地，来上海个交关人又非平庸之辈，辣衣食住行各方面，移民带来了多元优良个生活习俗。单讲饮食小吃文化，上海就熔江南风味于一炉。早辣上世纪二三十年代，辣上海个闾里巷间，各种小吃争相呼吆，本地人卖擂沙圆、糖粥、熏肠肚子，苏州人卖甘草梅子、盐金花菜、小虾米豆腐干，宁波人卖鸭膀鸭舌头、醉蟹黄泥螺；外加广东人卖鱼生粥、云吞面、伦教糕，苏北人卖“椠【qi削】光嫩地栗、麻油馓子”咾啥。每当夜色笼罩春申辰光，小吃个叫卖声伴随了各种方言个独特韵味辣辣微风里向荡漾开来:“桂花赤豆汤”、“白糖莲心粥”、“五香茶叶蛋”、“猪油豆沙八宝饭”……余音袅袅，回味无穷。

　　拿“糕饼包团”来讲，上海老快个就集中了江南糕点个特色。像“印糕、海棠糕、松子糕、赤豆糕、黄松糕、条头糕、糖年糕、寿桃糕、定胜糕、云片糕、茯苓糕、粢饭糕、鸡蛋糕”，“大饼、羌饼、葱油饼、面饼、芝麻饼、酥油饼、香脆饼”,“小笼馒头、生煎馒头、肉馒头、素菜包、高脚馒头、烧卖、花卷”，“汤团、双酿团、金团、青团、糖圆”。从国外又传来了“饼干、薄脆、奶油蛋糕、椰丝蛋白球、一口酥、蝴蝶酥、曲奇饼、哈斗、卷筒、蛋塔、派”咾啥各种介西式点心。搿眼糕点辣当年侪使人耳目一新味觉大开，上海人有吃福了！

　　乃末，上海人就对美味个小吃起出了交关美名。有一种两面煎成焦黄个面条,叫伊“两面黄”；有一种形状像袜底个酥饼，冠名“袜底酥”；一种颜色形状像蟹壳、里向含酥油外面加了芝麻个小烘饼,叫伊“蟹壳黄”；还有一种正面形状像老虎脚爪个甜烘饼,就称“老虎脚爪”；一种做个辰光用手捏出一个凹形个无馅小团子,名叫“瘪嘴团”。

　　上海闲话当中集中了江南人烹调食物方法所有个动词，有“烧、炒、煎、蒸（清蒸甲鱼）、炖（清炖鸭）、笃（笃蹄膀）、焖（油焖笋）、煸（煸咸菜）、煼（煼油肉）、煠（煠毛豆）、熯（熯面饼）、氽（氽油条）、焐（焐酥豆）、焋（焋糕）、烘（烘山芋）、汆（汆芹菜）、溜（溜鱼片）、熬（熬白菜）、爆（爆鸡丁）、脍（脍三鲜）、炸（炸虾球）、扣（扣肉）、烤（烤鸭）、煨(煨面)”，汇江南饮食文化于一炉。各种烧法大家会几种，上海人相信小乐惠，一到夜里，常庄优哉游哉【bhoe，躲】进小楼，滑稽听听，老酒渳渳【mi，小口少量喝】，蹄髈笃笃，螺蛳嗍嗍。

　　上海人越吃越开心，越有味道，乃末海派散发式个思维，催生出了形形色色“吃”个熟语来：吃价，吃香，吃瘪，吃酸，吃药，吃得开，吃勿消，吃生活，吃牌头，吃搁头，吃轧档，吃螺蛳，吃豆腐，吃大饼，吃小灶，吃下脚，吃生米饭，吃老米饭，吃萝卜干饭，吃辣货酱，吃空心汤团，吃地段，吃房型，吃红灯。看了上面个词语，晓得上海人哪能吃法？先告诉侬两条，“吃吃侬”就是“惹你欺负你”，“吃煞脱侬”就是“爱你没个完”！