万变勿离其宗——上海话前世今生之十

　　文/钱乃荣

　　上海从20世纪10年代起就是全国金融、经济搭仔文化个龙头，上海方言也自然个成为江南以至全国语言发展个龙头。1935年，当时提倡“大众语”个乐嗣炳先生就写到上海当年语言生活个崭新面貌：“中国的现阶段是产业革命。上海港每年出入船舶二万多只三千多吨，在世界只让纽约……充实的物质文化发展了相应的精神文化，近几十年来主要的文化运动和文化人大都从上海出发。随着时代而演进，上海是现代中国交通的枢纽，产业的大本营，文化的中心点，同时是新中国语顶大的制造厂；一件新的事物在上海发现，上海人立刻替它制造一批新的语词，大批的翻译大量的书报每天播送着新语词，最先流通在上海……它汇集了全人类语言的精华，是代表大众的思潮的，它一面不断生产，一面散布各方。”

　　上海话个高速发展，使得古代形式、近代形式、最现代个形式，农业社会、手工业社会、工业社会、商业社会个各种词语，同时浓缩搭积累辣辣几代人个口语中，搿个使上海话个日常用语成为一种时代层次十分丰富个语言。

　　上海话也辣100年间一跃而成为中国汉语三大方言（北京话、广州话、上海话）之一。到20世纪二三十年代，城区个上海话无论辣语音搭语汇浪向侪取得长足个发展，伊搭城郊外四周个老上海话拉开了相当大个差距。由于上海个地位，后来大家就公认上海城区里向个新上海话为正宗个上海话，而拿四周乡镇浪向仍然辣辣缓慢变化个老上海话按地名称之“江湾话”、“梅陇话”、“三林塘话”咾啥，或者统称叫“上海本地老闲话”。通用上海话个地域，大致辣90年代以前个上海十个市区范围之内，当时上海市版图上个十大郊区都还是以县称呼个。90年代以后上海方言分布个变化、语言哪能变化，搿个是后话了。

　　都市化以后个上海话发生了巨变，词语新陈代谢比其他城市快速得多，变得五光十色，多姿多彩，变化之处，俯拾皆是。上海话个韵母从1853年（英国传教士艾约瑟记录）个63个合并成2003年（笔者调查记录）个32个，上海话个声调从继承古汉语完整个8个声调合并成吴语区最简单个5个，减少将近一半。搿个是我国近代方言史浪绝无仅有个奇迹。

　　因为上海1843年开埠后经济文化浪向老快就形成了中心地位，移民来源个五湖四海互相抵消，呒没一种方言能够较大个影响上海话，或者几种方言拼合取代上海方言，上海话还是辣老上海话基础浪稳定有序个持续发展。上海话到2003年的10个元音音位搭仔1853年10个元音音位完全相同，22个辅音音位也呒没变化，呒没吸收过任何一种方言里（包括普通话）个一个音素，吸收其他语言个词语侪是以“借词”形式用上海话语音发音个。语言自有其严格个结构搭变化个规律。一个半世纪里向上海方言尽管变得老多，但万变勿离其宗。

　　从1845年到1950年100年间，西方传教士用现代语言学个方法接连勿断辣上海出版了四十多本记录上海话个著作，包括课本、故事、语法、音节表、字典、词典、圣经、报纸，真实个记录了上海话个语音、词汇、语法，搿眼书见证了上海话快速又连续个变化。