突破上海话传承个瓶颈——上海话前世今生之十三

　　文/钱乃荣

　　上海原来就是一个移民城市，过去外来人口甚至超过本地居民几倍，但是上海话辣辣上海传承搭发展得邪气好。当年上海话是哪能传下去个呢？刚来个第一代外地人多数讲家乡话，因为年龄关系要学上海话也勿会学得老好。但是伊拉个下一代，辣小学里向下课辰光自然会跟了本地小囡学会一口老标准个上海话，小人自有天生学语言个能力，会学得既快又准，变成了讲上海话个上海人。

　　对于当地人来讲，母语方言本来是勿需要学个，是小囡跟了母亲自然会讲个最流畅个第一语言。但是现在哪能会得倒转来学上海话搿能吃力呢？

　　上海70后、80后（前期）个人，现在尽管辣工作辰光讲普通话个场合多了，但是伊拉普通话、上海话依然讲得交关好，原因是伊拉从小辣辣幼儿园、中小学里下课个辰光是顺其自然通用上海话个。11岁之前学会了上海话，只要有场合用，是勿会退化个。

　　当今上海话发生严重个传承危机，主要是观念浪出现了差错，前头有段辰光大力推广普通话个同时，有点人拿普通话搭方言个关系错看成是“一个要长，一个就要消”个对立关系，要辣全国统一语言，就要辣学校里关脱方言，乃末辣90年代初开始采用了交关强制措施勿准下课讲方言，上海话辣少年儿童当中从进幼儿园开始就勿能顺其自然使用了，搿个是造成90后、00后大多数学生勿会讲上海话个根本原因。而假使20岁以下个大多数青少年勿讲某个方言，搿个方言也就濒危了，大人讲得再好也呒没用。

　　事实浪，语言多元、文化多元是人类生活个正常形态，也是一个世界性大都市应具有个基本品性，普通话搭方言应该是互补双赢和谐相处个关系，人民群众中个生动口语是全国通用语个活水源头。

　　过去有点人认为只要辣屋里向爷娘搭小囡讲方言，方言就能够学会传承了，其实勿然。现在事实证明，即使屋里两代人侪搭第三代讲上海话，小人从学闲话起使用了，一到幼儿园辣只有普通话个环境里，勿到一个月，上海话侪统统忘记勿会讲了。

　　各地个事实侪证明：单靠家庭里两代长辈搭孩子讲方言，小人同辈间互相交际辰光勿讲，大多数人是勿会习得方言个，因为语言本质上是一个交际工具，同龄人之间个讲话环境更重要，伊拉勿天天互相交流，哪能自动积累词汇量学会一种语言呢！

　　事实也证明，我国有不少至今下课可自由讲方言个城市，尽管外来人口也很多，并勿存在方言衰微个危机。

　　所以，阿拉一直辣辣提出要采取措施突破方言传承个瓶颈。前年由中国社科院语言研究所所长刘丹青领衔苏州等地一些语言学家辣香港，明确提出应该“上课说普通话，下课说方言”，使孩子辣学语言个关键年龄阶段既学好普通话也讲好母语方言。上海语委也根据国家语委个要求，明确了“推广普通话、传承上海话”两件工作要做，而且已辣20个幼儿园试点辣非知识正课里推行讲学上海话，已经取得了一些经验。

　　今年6月5日辣苏州，中国政府搭联合国科教文组织共同举办了全球近百个国家搭地区400余名代表参加世界语言大会，刘丹青所长明确说：“要有自觉的理念来保护方言”，“学会方言，同龄人的交流是主要的”，“要放宽校园里说方言的限制”，“应该鼓励孩子学好方言，没有必要去限制”。

　　单靠上课教小学生学上海话，勿拨小学生自由交际，是学勿会上海话个。关键是顺其自然让伊拉拿从家里学得个上海话自然带进幼儿园小学讲。下课通行了上海话，新上海人个孩子会极快自然跟上去学会一口上海话个。伊拉也应该有互相交际家乡方言个天地。