上海话正音——上海话前世今生之十五

　　文/钱乃荣

　　有人问，上海话有勿有标准音？要勿要确定标准音？回答是：有交关人要学，当然要用标准音去教学；上海话当中有少数普通话当中呒没个字，也需要注音。所以要有一个上海话个拼音方案，便于大家学习搭仔纠正发音。

　　语言具有稳定性，但是随便阿里种活个语言侪是随着社会发展而变化个，所以阿拉确定个标准是相对个标准，当一个音辣大部分年轻人个发音当中侪朝一个方向发生了变化，侬要去硬拉是拉勿回转个。

　　根据语言学个原理，一个音位个发音，取绝大多数个人发个音可确定其标准音。像现在所谓个“分尖团音”，辣辣70岁以上个上海人当中只有极少数人还会讲，就应该排除辣标准音外，判断为非戏曲滞留音外个已淘汰音，上海话历史浪向已经淘汰个、如上世纪80年代复旦吴语研究室记录到个当年个老派音，还有不少。

　　辣辣调查考察了大量个上海人上海话发音以后，阿拉确定了上海话（搿搭讲个侪是城区上海话）个两个标准音系，一个是老派音（即80年代称呼个中派音），现在主要辣65岁以上个人当中使用；另一个是新派音，65岁以下个上海人讲个是新派音或者向新派音过渡当中个音。笔者出版个上海话学习课本，有用新派音系注音个，也有用老派音系注音个。

　　上海话个注音假使用国际音标来注，用起来十分困难，因为普通个电脑浪侪呒没搿种符号，使用26个拉丁字母来注音就方便多了。辣辣2006年深圳召开个第一届国际上海方言学术研讨会浪向，国内外上海话研究搭教学个老中青学者讨论了已收集到个21个上海话拉丁字母方案后，用投票方式以压倒多数票通过了一个“上海话拼音方案”，就是现在电脑《上海话输入法》《新民晚报》“上海闲话”版浪通用个方案。

　　搿个方案是搭普通话拼音方案靠拢个方案，凡是上海话当中搭普通话相同个音，侪用普通话一样个字母表示，所以易读易用。

　　先列声母（字母后排例字）：b博八，p扑拍，bh薄白，m摸麦，f福发，fh服罚；d得搭，t脱塔，dh特达，n呐捺，l勒辣；g鸽格，k刻客，gh搿轧，ng扼额，h喝瞎，hh核盒；j鸡甲,q欺恰，jh旗剧，x希削，xh钱席；z资扎，c粢插,s丝杀，sh字石。

　　上海话个声母，比普通话多一套英语中也有个浊辅音，是保留个古音，用加h表示浊音。

　　再看韵母，i衣里，u乌路，yu迂旅，a啊喇，o喔马，e埃来，y字次，oe安乱，ao澳老，ou欧楼；an鹦冷，ang肮浪，en恩论,ong翁龙;ak鸭腊，ek遏勒，ok恶陆，ik益立；er而尔，m姆呒，n娪，ng鱼五。

　　为打字方便，普通话u上加两点个“于”音，搿里改为yu；因有时要记分尖团个沪剧，“字”类韵母，标y,勿用i；ao、ou读音搭普通话相近；韵尾k,表示入声，读喉塞短音，ik读如英语is的i音，ak读如上海话“阿哥”的“阿”音，ek读如英语abook中的a音,ok读如英语book中的oo音。

　　上海话当中“i、u、yu”开头个字，也分清浊，浊音也要加h，像：要yao，摇yhao；污wu，舞whu；郁yuik，越yhuik。

　　上面是上海话老派音系，新派音系是老派个一些韵母合并：ek色勒=ak杀辣,并为ak；an省厂=ang赏唱，并为ang；oe暗寒=uoe碗换，并为oe；yu豫句=yuoe园卷，并为yu。晓得搿一点，看老派音系读出新派音交关便当。辣自然个方言中，侬要叫讲新派音个人转讲老派来讲闲话是勿大可能个，方言个音系通常是辣11岁前学成个。