神奇的“哎、安、凹、欧”（下）

　　文/丁迪蒙

　　“凹”搿个音普通话里也呒没个。但是英文里向有个，“good”，“door”，里向就有搿个“凹”音。

　　搿个“凹”上海人也常庄用。比方：甲：侬搭我一道去好伐？乙：凹。

　　征询意见后，对方同意就讲“凹”，意思是“好个”。

　　“凹”是呒没声母个，可拿伊直接拼到声母里去。凡普通话里韵母是“ao”个，沪语里侪用“凹”。比方：b、p、m、d、t、n、l、g、k、h、ji、qi、xi、z、c、s，声母后加“凹”就读“包、泡、猫、刀、套、脑、老、高、靠、好、交、巧、小、早、朝、草、超、少、扫”了。

　　用个儿歌帮侬来读好搿个音：摇啊摇，摇到外婆桥，外婆叫我好宝宝。

　　“欧”搿个“欧”，上海人也常庄要用。比方：“欧，阿拉赢喽，伊拉输脱喽！”表达一种开心个，小人看人家好戏个感觉。

　　搿个音普通话里也呒没。哪能读呢？“凹”个嘴巴是圆个，拿伊拉开变成功扁个就对了。“欧”呒没声母，拿伊直接拼到声母里去。搿个音对应普通话里个“ou”，凡普通话里韵母读“ou”个，辣沪语里侪是“欧”。比方：m、f、d、t、n、l、g、k、h、ji、qi、xi、z、c、s，声母个后头加“欧”个音就读“谋、否、斗、偷、楼、狗、扣、后、九、秋、修、走、周、凑、臭、馊、手”了。

　　用个儿歌帮侬来读好搿个音：落雨喽，打烊喽，小八腊子开会喽！

　　搿个四个汉字个沪语发音邪气神奇。只要“哎”“安”“凹”“欧”会得讲，上海闲话发音就变得老便当了。