神采飞扬斗“蹔𧉆”

　　麟康/画

　　文/蒋宗孚

　　“蹔𧉆”【she jik】即“蟋蟀”，亦称“促织”。苏州人老底子欢喜讨口彩，谐音“赚积”两字，侬想一只小小“蹔𧉆”，又有“赚”，又能“积”，财源兴旺，讲个人听个人侪沾点喜气。

　　记忆里小辰光个夏天，勿仅有光明牌赤豆棒冰，勿仅有六神明星花露水，勿仅有对楼窗口飘来嗲溜溜个《马路天使》四季调歌声，更有床底下青黛瓦罐里蛰伏个“蹔𧉆”搿种悦耳动听个鸣叫声音。昔日《诗经·七月》就讲到过：“七月在野，八月在宇，九月在户，十月蟋蟀，入我床下。”搿种小虫是直翅目蟋蟀科昆虫，全球约2400种，已定名个约1400种，中国已定名个有30多种。雄虫通过前翅浪向个音锉，搭后翅浪向一系列齿（约50-250个）相互摩擦发声，声音高低主要取决于每秒击齿次数。雄虫发声鸣叫功能有二：一是宁静月夜悠悠鸣声寻求配偶，二是两雄争斗鼓翅扬威激励霸气。

　　沪虫最有名个地方数闵行七宝搭仔崇明老鼠沙。明、清两朝，七宝“蹔𧉆”曾经成为皇家制定贡品，身价荣耀。尤其七宝名虫“铁砂青”，之所以垃拉众多名虫中崭露头角，脱颖而出，源于明清以来习俗以金秋斗虫盛名，七宝个“蹔𧉆”体大、头阔、牙板厚，骁勇善战。夏末秋初，暑期过半，正是捉“蹔𧉆”个好辰光。准备好带柄漏洞个“蹔𧉆”网、塞棉花团个细竹管筒、长柄螺丝捻凿【起子】、冷开水，最好拣个【选个】厚云阴天免得热辣辣太阳暴晒，邀约同伴到郊野捉“赚积”。学会听鸣声辨析识虫：声宽宏体型大，声低沉生长期长。轻手轻脚缓慢靠近，因为“蹔𧉆”听觉敏锐，能感受地表轻微震动。倾听准确再动手，碰着虫辣泥土洞穴里，可以用工具挖或灌水赶。一定要用网捕捉，以确保前须、尾须及六爪完好，乃末装进竹管筒塞紧棉团。

　　养“赚积”宜用青色或黑色砖盆，如果是盆底刻印“李东民制”、“杨同興制”个盆就更加嗲，老盆阴沉呒没异味，透气性好。可喂食饭粒、苹果粒、南瓜粒，盆宜每天清理，水盂换水。偶尔可用特制个蒸熟并晾干个“蹔𧉆”草，逗引伊开牙撕咬，轻触尾须训练急转身。搿能静养两三周后，方可相斗。

　　斗“赚积”搿天是男小囡个盛大节日。相邀双方兴高采烈各自双手捧着一叠盆罐来，由公证人按体型大小配对，就像拳击比赛按体重分重量级、轻量级。宽大个斗盆当中用纸板分隔，双方斗虫入盆，公证人用特制个引草分别引斗，鸣声口瞿口瞿 ，鏖战将发。时机到，启隔板，只见两雄各自甩击细长前须，寻觅对手；两将相临，开牙发口对咬。围观个人屏息静气，目光凝视自家爱将，暗自加油助威。只见牙口相交，后足前爪发力相抵，竟然翻转过来而牙口勿松，搿能捉对厮杀的的刮刮【确确实实】惊心动魄。只见那青头将军、黑头金刚侬来我往，几个回合下来，青头将军占据有利位置猛然发力，黑金刚被甩至盆边。青将军鼓翅鸣叫，兴冲冲帅气高扬，而黑金刚则垂头丧气，灰溜溜偃旗息鼓。如此精彩斗局，哪能勿叫老早地个金色少年神采飞扬！

　　解释：蹔𧉆【she jik】。蹔，《玉篇》走部才滥切：“蹔，超忽而疾也。𧉆，《广韵》入声质韵资悉切：“蹔𧉆，蜻蛚别名。《诗经·唐风》疏：“蟋蟀，一名蜻蛚。”