文/宜青
沪西个长寿路老早叫“劳勃生路”,西康路曾叫小沙渡路,搿两条路交汇个地方脱仔周围一带个所在地片,一向有“大自鸣钟”个叫法。搿搭既是交通枢纽,也是商业中心,垃拉上海滩浪也是一个响当当个大地名了。不过几十年来侬跑到埃面,总归看勿到“大自鸣钟”个大钟个样子,搿个到底是哪能一回事体呢?
原来历史浪搿搭还真有过大钟!
搿一带近苏州河,近代上海开埠以后,境内苏州河流域由东向西逐步推进开发,因为西段地价低廉、人口稀少,乃末交关工厂侪到搿搭块开厂。迭些工厂既有民族资本个,也有外商投资个。搿一带也就形成为上海个一大工业区———沪西工业区。外商企业中日资是主要个力量,日本经济势力借中日《马关条约》个签订,得以大举侵入上海。其中内外棉株式会社就是日资个一家大型企业。内外棉公司派出一个叫川村利兵卫个董事到中国来考察开拓,除了垃拉青岛以外,重点选择了上海沪西一带,先后开设了内外棉三厂、四厂、五厂、六厂、七厂、八厂、十厂、十一厂、十二厂、十三厂等,川村可以讲为内外棉公司立下了大功。1922年川村利兵卫病逝。上海内外棉公司各厂个日本厂商为了纪念伊,就垃拉闹猛个劳勃生路、小沙渡路路当中横里造了一座钢筋混凝土结构个“川村纪念塔”。碑底为石座,身高105英尺,内有六层,塔个上部四面侪摆有一大钟,除脱发出声音之外,夜到头还会通电放光。因地处要津,钟塔标志性极大,乃末大家逐渐拿这一区域也叫“大自鸣钟”了。
到上世纪50年代,因搿搭交通繁忙,市容繁华,搁垃拉路当中个搿座钟塔成了过往车辆、人流个障碍,而且迭个又是历史浪日本人侵沪个一个纪念物,乃末垃拉1958年8月就拿伊完全拆光。现在搿个一带已是高楼林立,商厦栉比,一片现代化新气象。
版权声明:
• 凡注明来源为“新民网”的所有文字、图片、音视频、美术设计和程序等作品,版权均属新民网所有。未经本网书面授权,不得进行一切形式的下载、转载或建立镜像。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641133 021-52921234转 新民网 传真:021-62677454
邮箱:稿件处理 处理时间:9:00—18:00