吃喜酒搭拷甏底

　　各到各处侪有自家个风俗习惯。垃拉四五十年前，我住垃拉沪郊宝山、罗店一带，老早底搿个地方拨拉人家叫乡下头。不过办喜酒勿要太闹猛噢，亲戚朋友来仔行情行事，东家侪垃拉房门前头个院子里搭起帐篷支好灶头，雇请司厨老爷，垃拉自家屋里向操办婚宴，大吃喜酒三天，第四天再来个拷甏底。

　　吃喜酒搿日大都选拉腊月或正月里，宅浪向嗡过来轧闹猛个人是木老老。各自拿屋里向个八仙桌、长凳，连碗筷餐具侪要统统搬过来一道使用。喜酒要吃满三天，头一天叫“喜开席”，宅浪男女老少齐上阵，第二天叫“正席”，又叫“全满席”，新郞新娘个屋里人，各方个亲戚朋友，再加上宅浪个人共聚；第三叫“圆满席”，各路人尽情吃喝，娱玩唱戏闹新房，一派喜庆场面，让人难以忘怀忘记勿脱。

　　三天过后，第四天就叫“拷甏底”。拷甏底就是拿三天喜酒吃后，几十只老酒甏底下头存拉眼脚脚头，一只一只从甏底拷出来，归归拢，再拨拉大家吃。搿辰光客人侪走了，东家再叫宅浪向人，过来搭搭手、帮帮忙，一般是每户来一个壮劳力，拿从各家借来个家生侪贴上红纸(表示喜气洋洋)归还原主，搭个临时帐篷拆脱，屋里向家生搬好，摆整齐。一切停当后，东家就再请迭些人中浪向吃顿饭，算是答谢大家。

　　搿歇辰光，忙了三天个宅浪人，侪真正轻轻松松围坐垃八仙桌旁，笃定泰山，跷跷二郞腿，渳渳老酒，猜猜拳，天南地北谈谈山海经，吃到下半日三四点钟。个个醉醺醺，侪各自回屋里去，乃末拷甏底就算歇搁。

此文因配音关系，略作改动。