毛脚

　　老上海闲话叫呒没过门个儿【ni】子个、囡儿【ng】，而且已得到双方大人默认交往个男女朋友为“毛脚”，垃拉上世纪七八十年代也称“敲定”，官方语言应为“未婚夫”或“未婚妻”。

　　“毛脚”勿晓得出典是啥？是因为伊拉还勿适应搿种青黄勿接、尴里勿尴尬个新身份——原则上已拨对方屋里向跟大人接受，但心里向还七上八下——上海话讲起来，蟹脚还软垃拉，所以有“毛脚”搿个讲法？

　　老派上海人极少有“闪婚”，一般是男女独自交往一段辰光后，觉得可以确定关系了，就带去见双方大人。一般当然是男方先上门，得到大人pass【通过】了，男方开始频频上门，并常常拨垃女方屋里向留饭【北方人称蹭饭】，就拨垃女方亲友叫做“毛脚女婿”。像张爱玲个《半生缘》中，沈世钧就垃拉曼祯屋里做过一段“毛脚”，每趟伊来吃饭，曼祯姆妈还会去买点熟小菜作添菜。当然，搿顿饭是勿能白吃个，毛脚女婿要识相，手脚要勤快，主动帮女方屋里向做点事体，譬如买煤饼、背米咾啥，女方当然也偶尔会上婆家做做客，但只限于逢年过节，女方走得太勤，显得有点“急吼吼”。假使讲毛脚媳妇会得做人，常常想着搭未来个婆太太或者小姑小叔子结点绒线衫或者做几双鞋子，迭个就邪气讨人欢喜了。

　　现在回过来看看做“毛脚”搿段日脚，是双方从花前月下到油盐柴米过日脚个邪气重要个过渡。像阿拉搿种老派上海人看来，结婚勿单是两个人之间个事体，而且跟两个屋里向之间有千丝万缕个关系拉海。做毛脚，就是男女双方了解对方个家庭文化搭成员最好个途径。而搿个一切只有从过日脚搿种小事体当中再能感受到，为今后融入搿个伊呒没任何血缘关系个屋里做好准备。《半生缘》中，阿拉已看到沈世钧垃拉弄堂里教曼祯搿几个阿弟学脚踏车个细节……

　　阿拉上海人还是比较正宗，男女谈朋友必定是以结婚为最终目的个。否则，处处留情，只开花勿结果，拨拉人家叫做“烂糊三鲜汤”。“试婚”或者“未婚先同居”，还是会得拨人家戳背脊。而“毛脚”，可以讲是阿拉老祖宗发明个既聪明又折中个中国式个“试婚”。

　　毛脚毕竟勿是拨捆牢个大闸蟹，伊即使垃拉做“毛脚”辰光，男女双方一旦觉着谈勿下去，还是可以拗断分手个。不过一般人家非勿得已，勿大会走到迭步。所以讲，直到阿拉搿代，选择“敲定”是十分慎重个事体。谈朋友搿辰光特别长——从认得到恋爱，再到拨双方大人认可做“毛脚”，少讲点也要头两年。不过闲话讲转来，我还是老赞成有段做“毛脚”个日脚。

此文因配音关系，略作改动。