走出上海个上海闲话

　　文/沈锡伦

　　搿搭讲个“走出上海”是广义个，实指走出吴方言区（上海闲话是吴方言个代表方言）。老上海人侪有搿能个感觉：现在个上海小囡已经勿大会得讲的的刮刮【纯正】个上海闲话了，覅【viao】讲小囡了，就算是中年人，讲闲话也【hha】是一歇歇上海闲话，一歇歇普通话，转来转去调频道。不过，调只角度看问题，上海闲话垃拉受普通话影响个同时，也对普通话搭各地方言产生了影响。今朝我想就迭个问题搭大家茄茄山河。

　　“嗲”，垃拉上海闲话里有两个意思，一个是【非常好】，阿拉称赞一样物事邪气好，常常说“嗲”（像“搿部电影老嗲个，我看了还想看”“迭只菜老嗲个，味道崭”）；第二个意思是“娇”，特指女性娇滴滴、娇柔妩媚个样子。上海闲话里个“发嗲”就是撒娇，女人年纪稍为大一点还要装嫩发嗲叫“发老嗲”，过分个发嗲叫“嗲勿煞”【嗲不死】。第二个意思的“嗲”现在北京人搭仔交关别个地方个人也搿能讲了。我看央视四套“海峡两岸”节目，连受邀个台湾嘉宾也用了阿拉上海闲话里个“嗲”。

　　“作”，本生是指年轻姑娘垃拉男朋友面前任性，发点小脾气。也好指小囡垃拉大人跟前任性，哭闹，勿达目的勿罢休，大人拨伊弄得勒烦煞脱了，就会得讲：“侬再作就拨侬吃生活【揍你】。”“作”搿种特有个意味是普通话词语缺少的。自从2002年杭州籍作家张抗抗出版了长篇小说《作女》（迭部小说20章，每章标题里侪有一个“作”字）后，“作”就迅速走红，开始风行全国，我有个朋友是北京人，据伊讲，现在北京人也讲“作”了。还有“十三点”，也进了商务印书馆出版个《当代汉语词典》里了。