五斗橱浪个雪花膏

　　文 / 食家饭

　　埃个辰光，老少有一张梳妆台堂堂皇皇个陈列勒垃卧室里。生发油、花露水、雪花膏一应小零碎侪放勒垃五斗橱浪，讲究点个，旁边会摆一套车料玻璃冷水杯或者一只花瓶，实惠点个，就是一只每到整点当当响个三五牌台钟。

　　面对五斗橱个镜子，雪花膏是每天要搨个。浅黄个铁皮小圆盒是“友谊”牌个，日脚过得仔细个女人，勿舍得拿盒子里一层银色个锡纸全部拉脱，就搿能介 【xiao】开一只角，够一只手指头挑一点出来慢慢用。友谊雪花膏老厚个，节掐【jikkak】盖搿能一点就可以均匀个滋润手搭面孔，全家男女老少侪用，一个秋冬也不过用一两盒。

　　最寒冷干燥个冬天，交关人欢喜用蛤蜊油，上海人也叫蚌壳油。因为含有凡士林、矿物油，又有活血个冰片，也老滋润个，再干冷个天也勿怕冻裂。盛蛤蜊油个就是大蛤蜊个壳，接口地方是天生个榫卯结构，合拢起来严丝合缝。贝壳有自然个花纹搭光泽，是完美无瑕个包装。一趟勒垃哈尔滨旅行，看见有下岗个人拿库存蛤蜊油摆勒地摊浪卖，我拣了几只纹路特别漂亮个，带回来送朋友，大家侪爱勿释手。

　　蛤蜊油呒没啥香味道。好闻个是蝴蝶柠檬霜搭百雀羚，上海人昵称“香香油”。蝴蝶霜是清爽个柠檬味，百雀羚要浓郁一眼，不过搨勒面孔浪，香味就融开来，变得淡淡个，要凑得老近再闻得到。搿种香味自然勿会像现在流行个苔藓味、烟草味、热带水果味，是文雅端庄个上海女人个气息，是漫长日脚宁静安稳个气息。百雀羚个盒子最漂亮，宝蓝和明黄的底色，几只鸟雀，些微神似奥杜邦个手笔，鲜艳活泼。我最喜欢百雀羚个这种蓝眼色。大盒子个百雀羚用光，留了盒子装自家心爱个小物事，雪花膏用光了，香味还勒垃，开开合合好多次，终于散了去。妮维雅面霜初进中国辰光，曾分几批制作蓝眼色个面霜盒子，一趟趟试下来颜色侪勿如人意。最后还是用了德国进口个原装货。

　　我从杂物当中寻出来囥了多年个百雀羚盒子横看竖看，宝蓝色虽然旧了，还是潋滟着美丽个色泽，丰满静雅。妮维雅，是勿是要寻搿种介个蓝眼色呢？

此文因配音关系，略作改动。