甏头咸菜

　　文 / 寿幼森

　　老早辰光屋里向兄弟姐妹交关，介许多【这么多】嘴巴要吃饭，就靠阿拉爷一家头【一个人】赚钞票，屋里向姆妈当家，搿个难度可想而知，乃末姆妈常常会拿出老早乡下头带出来个拿手本领：腌咸菜。一般性个腌咸菜也呒啥稀奇，弄堂里交关人家侪会，就是搿只“甏【bhan】头咸菜”是阿拉姆妈个拿手专利。

　　只要雪里蕻菜上市个辰光，姆妈就会到小菜场去拖回来交关雪里蕻菜，拿伊根根头切脱，剥脱外头个老叶、黄叶，用水汏清爽，摆辣太阳下头稍微【lang，晾】干，再拿伊切成细段，乃末就开始用盐来腌制甏头咸菜了，拿切细个雪里蕻菜搭盐一道辣辣大个搪瓷面盆当中【niok】，一直到稍稍洇出水来，再可以塞到甏里向，甏勿好忒大，要用中等大小个甏来腌最好，咸菜塞满八九分后，要看到洇出水来，拿伊用力压实，上头还要用重个石头压紧，过脱两个礼拜个辰光，只要淋上一眼眼麻油可以吃了，味道极其爽口，搿个辰光弄堂里就是搿点有钞票人家吃惯山珍海味、油腻物事个，也侪会得拿了一只小碗来讨一碗来清清油腻肠胃。

　　因为咸菜腌得好勿好个关键就是辣摆盐个比例上头，弄堂里交关人家侪想学了自家操练，结果侪呒没成功，勿是发酸就是咸得发苦，可见姆妈绍兴老家腌咸菜搿套经验还是相当老到个！

　　从现在个角度来讲，假使搿能个甏头咸菜还可以用来作为其他食材个配料浪，像烹饪鱼个辰光撒一层甏头咸菜，搿味道鲜是鲜得来屋里也勿认得了！可惜屋里向呒没一个小人学到姆妈个真传，所有个回味只好辣辣对姆妈个怀念当中了。

本文因配音关系稍作改动