文/凌耀芳
配音/任立晨
记得小辰光阿拉唱过一首儿歌:“鬼【ju】鬼树林出,糕糰子拨侬吃。”讲个呢,是一个辣海浦东乡下头个道士勿入调,伊装神弄鬼骗脱村民交关铜钿,临走肩胛浪向还掮拉满满一洋米袋农民自家装个糕、包的糰子咾啥,拿回去拨拉伊家主婆吃。
乃末宅浪向有一个青年农民气勿过,伊寻来一根干粽叶,偷偷交系垃拉道士个朝天发髻浪向。道士走垃拉土路浪向还勿觉着啥,伊一跨进树林子,四周围静得臭要死,搿个辰光,伊只听得背脊骨浪向“窸窸窣窣……”响得来汗毛凛凛个,道士回过头去一看末,啥物事也呒没,乃末道士一想,勿好哉,碰着仔鬼哉。伊勿敢停下脚步呀,只好一面走,一面拿洋米袋袋里个糕糰子往地浪向厾【duo】,一面厾一面垃拉嘴巴里哼唱:“鬼鬼树林出,糕糰子拨侬吃。”
道士后面大约五十步远的地方,青年农民跟辣海,慢腾腾,笃悠悠,一面走一面往地浪向拾起拨拉道士厾脱个糕糰子。等到道士失魂落魄个回到屋里向,家主婆问伊:“糕糰子呢?”道士讲:“喔哟,覅去话伊,碰着仔鬼跟辣伲,伲拿糕糰子一塌刮子统统拨拉鬼吃得去哉。”家主婆照牢道士横看竖看,辣陌生头从伊头顶心浪扯下来一根粽叶,乃末道士晓得上当哉,伊豪燥跌煞冲死【xi】回过头去寻糕糰子么,阿里搭还有得踪影?
伲浦东乡下头装个糕、做个糯米糰子就是介好吃。小辰光看伲奶奶装糕,真个是馋唾水嗒嗒滴:拿四成糯米、六成梗米呛(掺合)垃拉一道,干磨成粉,呛一半水垃拉一只蔑筲箕里跟红糖、赤豆拌垃拉一道,再倒垃拉一只上大下小,辣海距离底部三分之一个地方有一个镂空夹层的木屉蒸笼里向,粉一层层铺垃拉里向,蒸熟一层,戳满洞洞眼,再铺上一层生的粉,一共铺五趟。等整个一屉糕一道蒸熟仔,拿木屉蒸笼顶倒,放垃拉砧凳板浪向切,切得屑屑薄还是邪气完整个一块糕,咬一口,糯嗒嗒,松扑扑,邪气好吃。像搿恁介好吃个糕现在是看弗见咾。
做汤糰,伲浦东人是用热个大米粥跟干个糯米粉捏垃一道和面,做成功个汤糰子,既糯软又勿得牙齿,搿个好吃头势啊!勿像有辰光从外面买得来个糕糰子,绷绷硬、粘搭搭。搿排里个蜜糕,吃拉嘴巴里,要末又硬又咬勿断,要末搭拉牙齿浪向牙齿也要搭脱哉。黏得怪头势啊!前半截头糕吞垃拉食道里了,后半截头糕还垃拉嘴巴里,老人千万吃勿得。松糕末切得厚蒸勿熟,咬勿动,连下拉吃(下在沸水里)也勿来事;要么切小一眼,噼啪碎脱,弄得砧凳板、料理台一天世界,要收捉(收拾)半日天拉。
生活当中做糕糰子个李鬼搭仔骗人吃喝个道士一票货。伲要拿眼睛擦得雪雪亮,一旦发现就捉牢伊。
本文因配音关系略作改动
版权声明:
• 凡注明来源为“新民网”的所有文字、图片、音视频、美术设计和程序等作品,版权均属新民网所有。未经本网书面授权,不得进行一切形式的下载、转载或建立镜像。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641022 021-52921234转 新民网 传真:021-62677454
邮箱:稿件处理 处理时间:9:00—18:00