文/马尚龙
配音/丁婷婷
开茶馆,望兴旺;摆茶摊,为糊口。同样是做茶水生意,相差就大了,再讲,孵茶馆个侪是呒没事体个,吃茶摊个侪是做生活个、读书个、出汗个。
茶水摊摆辣晒不到太阳个阴头里,等到要晒到太阳个辰光,茶水摊就搬到了马路对面。茶水摊个老板娘——搿个称呼实在也是勉强,一个摆摊头罢了,绝对呒没像《沙家浜》中阿庆嫂一样个八面玲珑,但是小本经营又是勤快,又是卫生,也面慈目善,客客气气。小台子浪个八杯十杯大麦茶,侪是冷透了个,适合年轻人个牛饮,小朋友来了还有冷开水,1分一杯,老少无欺。每一个茶杯侪有茶杯盖,玻璃个,有些茶水摊简陋一点,也必定要用一块块小玻璃用作茶杯盖,挡脱个不是灰,是苍蝇小虫一类;茶水摊虽小,爱国卫生很重要。喝过个茶杯,老板娘倒是一定会浸辣消毒水里个。茶水摊虽然也有两条长凳,是拨过路人歇歇脚个,要吃功夫茶是不可能个。棒冰雪糕倒是有个,光明牌个,其实也只有一只牌子个冷饮。雪柜是不可能有个,就囥辣大口个保温瓶里;有大人带小人经过,亲切个招呼一句,讲不定就拿一根雪糕卖脱了;8分钱,当然比茶水好赚。剥下来个包装纸,禾聚(shou)起来还可以卖废品。
茶水摊个老板娘是哪能一个身份?连小业主也算不上,只是一个无证小生意,虽然搁仔脚坐辣,心里多半是辣羡慕马路旁边两扇大门紧闭个国营纱厂个挡车女工,因为小业主生老病死呒没劳保。辣解放后个很长一段时间,劳保就是生活等级,就是政治身份。从国营个纱厂到无业茶水摊,辣普通人常识看来,可以讲天差地别。
当然搿个茶水摊摆辣马路旁边,看中个只是搿一块地方既阴凉又人来人往,而不是纱厂个女工,纱厂女工侪是“做人家”个,下仔班,嘴巴再干,也不会辣茶水摊吃茶个,肯定就是回屋里厢去吃了,也侪是冷透了个。茶水摊老板娘有所不知个是,挡车女工虽然地位老高,但是每一次看到茶水摊女人脚翘翘个告人家搭讪,侪会辣一面孔勿屑当中,暗生羡慕:伊一日坐到晚,生活也勿要做,老开心个,阿里像阿拉挡车工,还要翻三班唻?
本文因配音关系略作改动
图 / 麟康
版权声明:
• 凡注明来源为“新民网”的所有文字、图片、音视频、美术设计和程序等作品,版权均属新民网所有。未经本网书面授权,不得进行一切形式的下载、转载或建立镜像。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641022 021-52921234转 新民网 传真:021-62677454
邮箱:稿件处理 处理时间:9:00—18:00