暖锅、电热锅、电磁炉（节选）

　　文图/阿仁

　　冷天一到，老底仔个上海人就要从灶披间里寻出暖锅来。上海人所讲个暖锅，就是京式个紫铜火锅。一只做工考究一点个暖锅辣老上海要卖老价钿个。屋里向能够搬出一只紫铜做个暖锅来请客，主人家就显得派头十足。生旺一只暖锅是有点技术含量个。木炭到煤球店去买质量最好个。勿但火头旺还经得起烧个木炭，上海人叫伊为钢炭。要烧红木炭个偷懒办法是拿伊放到煤球炉里去烘一歇。炭条红了，放进暖锅正中央个锅膛，还可以套上一只长个铅皮烟囱来拔拔火头。吃暖锅就是吃大杂烩，荤个、素个、生个、熟个都可以放到锅子里去煮一通。锅底可以铺上一层白菜帮子，咸肉、鲜肉、鱼丸、肉丸、河虾、肉皮、冬笋、笋干、油豆腐、开洋、鱿鱼……侬想吃啥就放啥进去。切成薄片个,要显示刀功个。摆出条理个，是展示花式。盖上锅盖，等汤水滚了开了，就可以敠【dak】到台子当中去了。冷天里吃暖锅，图个就是热汤热水、火热涾【dhok】涾滚。道地一点个，每样小菜都有备份。吃光了再加，加满了再吃。钢炭烧得力道勿够了，拿锅子再端到天井里去加炭加汤加水。最后，大家吃得快要投降了，就可以加进泡好个线粉，烫进汏清爽个菠菜，每人来一碗三鲜粉丝汤。味道好极了，鲜得侬眉毛也落下来哉！