公用电话撑市面个日脚

　　文/郑自华

　　辣辣廿几年前，上海个大街小巷，到处侪可以看到“公用电话”个牌子。公用电话，曾经是上海滩浪一道独特个风景。

　　公用电话间一般只有2、3个平方大小，电话间有好几只电话，配置是2打2接（2只可以拨打电话、2只专门接听电话，而2只专门接听个电话呒没拨盘）。电话打一次3分钟4分洋钿，传呼一趟3分洋钿，传呼费可以分一半拨个人，一半归公用电话站，站里会拿分到个钞票买套鞋、雨伞。公用电话传呼划地段个，就好比铁路警察各管一段。屋里向有私人电话个人家勿传呼。

　　公用电话间里向一般坐辣两个老阿姨，难板也有老爷叔。电话来了，勿会马上就去喊（传呼），往往要等好几张单子，才会走一趟。出去传呼个老阿姨一只手拿了几张电话单，一只手拿着铁皮喇叭（后来是电喇叭），一路浪喊过去:“15号亭子间小张，22号客堂间老王，31号三层阁蒋老师”。由于是老式房子，邻舍之间听到有电话，会接龙传呼，辣灶披间一喊，亭子间转到前楼，再到晒台，搿叫接龙。邻舍关系不大好个，就全当呒没听见。所以公用电话也是考核人际关系个试金石。脱传呼站关系搭得够（关系好）个，电话可以勿用挂，直接接听就可以了，但是辣付铜钿个辰光，侬要拎得清，除了付传呼费，还要拿电话费付了，否则，以后个电话板数是挂断个。因为挂电话是电话局规定个。电话挂断，等于要排队，等到侬拨电话了，有辰光对方占线，有辰光对方已经离开了，跌个辰光双脚跳也呒没用，只能怪自己拎勿清。为了搞好关系，让阿姨及时传呼，一眼常户头会天热买点冷饮，天冷买点糖果，拉拉关系，以便得到关照。辣传呼中，由于地方口音和文化高低个因素，经常会有老多有趣个故事。朋友老张个老婆到医院看毛病，伊拿看病结果通过电话间传闲话拨老张：“让老张带张报纸去医院”。老张随便哪能也想不通到医院带报纸去做啥。等老张急匆匆赶到医院，才弄明白，原来老婆被检查出“带状疱疹”，到了传话阿姨搿搭成了“带张报纸”，闹了个大误会。

　　伊个时候电话紧张，单位电话申请勿出，唯独申请公用电话比较便当，所以搿也是勿少烟纸店也有公用电话个原因。我伊辰光辣烟纸店上班，看见电话也比较新鲜。私事是勿能打电话个。夜快头，头头下班了，一把小锁拿拨盘锁牢（伊辰光电话侪是拨盘式），同时挂上一块“电话已坏”个牌子。一道进单位个同事门市部和门市部除了开会平时碰勿着，心里就想着电话联系聊聊。可是电话锁脱了哪能办？有高手指点，只要敲打按簧，1击打1下，2击打2下，0击打10下，一试蛮灵光，搿样电话就接通了，告同事就通过搿样个方式畅聊了起来。阿里晓得公用电话是单独记账个，收到个钞票专门放辣一只小盒子里，后来发觉收到个角子呒没打出个多，打电话个事情终于穿帮。

　　辣电话资源稀缺个年代，公用电话拨市民带来了很多方便。

　　随着私人电话以及手机个普及，公用电话退出了历史舞台，而关于公用电话个记忆却是深深个刻辣几代人个心浪。