无商勿奸搭无商勿尖

　　“无商勿奸”搿句闲话几乎已成老百姓公认个商场游戏规则：缺斤短两、以次充好、滥加添加剂激素……但侬勿会想到搿句“无商不奸”个说话最早个出典实在是“无商不尖”。

　　听我九十岁个爷叔讲，老早子交关行【流行】“无商不尖”搿句闲话。勿过，搿搭【这里】里个“尖”，勿是尖刻个“尖”，伊是有“添头”个意思。搿个是有说法个：从前小百姓买米，勿会像大户人家一样半担一担一买，总归是几升几斗零买个，等米缸空脱了再去买一点，搿就叫“升斗小民”。米铺个伙计舀米个家生就是一只木头个升，既是舀米也是量米，有一升量、五升量个大小勿等。米店伙计一手下去捺【将】米装满，再用一把戒尺捺米搭盛器个表面刮平。搿点伙计个眼光侪邪气准，客人对搿个也勿怀疑。就是搿能【这样】，伙计也会顺手再舀一眼米倒垃已抹平个米浪，搿能介米浪就会起一只尖堆，搿个就是米铺送客人个“添头”，搿就叫“尖”。老早底勿单米行，交关商铺侪有“添头”搿个行规。比方讲，布店有加三放尺，连点心店吃客小笼也会奉送一碗蛋皮丝葱花汤。去银楼买金器，也会送几只做工考究个首饰盒，常常帮衬伊拉个老主顾，逢年过节，银楼还会送眼迷你小金饰。搿就叫“无商不尖”。讲穿了，羊毛出垃羊身浪，迭个也是种营销手段，大家侪懂个呀，和气生财嘛。假使商家一利也勿肯让，就违反了“无商勿尖”个行规，帮衬个客人自然就少了。所以讲，只要卖家做得漂亮，买家也焐心，搿就叫和谐。老早底辰光，商家个诚信十分要紧。搿辰光，荐人学生意或者借贷银钱，侪要店铺作保，可见垃老百姓心目中，对商铺个信任老要紧个。

　　到底具体啥辰光开始有“无商不奸”个说法，我也讲勿清爽。听讲抗战开始，上海市面就勿灵了，勿少人开始大发国难财，囤积居奇，空麻袋背米、买空卖空、以次充好……以致有“米蛀虫”“房老虎”之说，老百姓纷纷抱怨“无商勿奸”。我对“无商不奸”最有深刻印象个是，以蒸馏水冒充青霉素药商王康年。公私合营后，企业属国有，一口价，呒没添头，顾客也勿会上当受骗，老百姓对国营企业是一百个信任，所以搿辰光倒是听勿大到“无商不奸”个抱怨。改革开放后，私人企业得到充分发展个空间，顾客享受到个“添头”倒也勿少：大减价、免费售后服务、免费送货上门……但同时地沟油、瘦肉精、三聚氰胺、偷梁换柱……时有所闻，令阿拉老百姓又汗毛凛凛个想起搿句“无商勿奸”个说法！

　　啥辰光，阿拉可以还商人一个“无商勿尖”个本色？搿能商家旺财又旺丁，老百姓也焐心！