真个用得着

　　文/任向阳

　　现在有得交关新上海人觉着上海闲话是一种文化，觉着应该保留上海闲话，觉着学眼上海闲话蛮派得着用场个。

　　有得勿少新上海人到了上海以后要垃工作浪向跟上海本地人打交道，假使碰着村里个村民，里弄里个居民，要是讲勿来、听勿懂上海闲话，勿光要碍着相互个交流，还会得影响到工作。比方镇里干部到村里向去，村民一般欢喜用上海闲话告侬交谈，葛末从外地新进来个年轻公务员就要学眼上海闲话，否则会话能力个偏差会得造成工作能力个勿足———工作对象情况跟想法也听勿懂，事体阿会得做得好?？告咾【所以】新上海人公务员当中有得九成个人表示顶顶想掌握个是上海闲话。

　　比方垃拉老年人比较多个医院里向，叫老年人讲普通闲话伊拉讲勿连牵【连贯】，老年人只会得讲上海闲话，医生护士告工勤人员听勿懂上海闲话老人老有意见———毛病出垃啥地方也听勿清爽，看毛病还看得准足??告咾华东医院拿“学好上海话，全心为病人”搿两句闲话联系起来，办了为期三个号头【月】个沪语学习班，俞卓伟院长要求垃华东医院工作个新上海人“听得明白，说得清楚上海话，使沪语成为他们个必修课”，结果喔，效果老好个，一个护士长讲，用上海闲话沟通以后“大大提高了患者个满意度”。

　　例子还有得勿少，总而言之，学上海闲话，用场蛮大、好处蛮多：告当地群体可以沟通了，沟通仔么相互之间垃感情浪靠近了，靠近仔么工作好做了，好做了么心情愉快了，心情愉快么就觉着日脚【生活】过了蛮有意思个。

　　新上海人，特别是一部分工作浪向罢勿脱要跟比较习惯用上海闲话表白个搿眼仔【部分】上海人交谈个新上海人，学习上海闲话真个老有必要个，至少搿是工作需要，是老老具体个工作岗位对任职人个要求。侬只要做迭份生活【工作】，就定规要懂上海闲话。

　　已经有交关新上海人晓得了学好上海闲话个道理，也体会到了讲上海闲话个好处。葛末现在学习个机会蛮多，可以看书、进学习班、上网、跟人家茄山河；而且现在上海人也老大气个，侬哪怕讲得勿像腔也呒没人笑话侬个，因为侬搿能介体现对自己居住地语言文化个尊重，还因为大家侪晓得，呒没啥人辣陌生头【一下子】就会得有板有眼个。