“阿乡”搿个词,一度流行上海滩。
上世纪六七十年代,城乡差别明显。交关所谓生活辣上只角个人,对乡下农民看大勿起,泛称伊拉“阿乡”,意思指农村个经济条件贫困,文化娱乐落后,显得土里土气。当时我插队郊区,同农田相依为命,拨风雨磨砺粗四肢,让骄阳晒黑仔面孔,由一个城里女学生融入“下里巴人”,外加【ga(并且)】还真正“落户”了——嫁了个当地农村后生【青年】。
迭桩婚姻,开始辰光姆妈数落我眼睛勿张张开,甘心受穷做“阿乡”。回娘家坐月子,伊又是心疼又心酸,讲:外婆要添个小“阿乡”哉。后来女儿出胎,婆家认为亲家公是教书先生有文化,让伊取名字。阿伯【爸爸,宁波话称呼】提议叫“阿香”,问哪能?我错听,以为叫“阿乡”,头顶心一记头火冒三丈。发牢骚:平常有人叫我“阿乡”,投来轻蔑眼光,忍声吞气罢了,为啥阿伯侬偏偏也要挖苦我?
姆妈个头摇得像拨浪鼓,眼乌珠一瞪指责阿伯寿头怪气。伊看我落下眼泪水,对牢伊连环炮一顿臭骂。阿伯笑笑:㑚【你们】侪覅误会,此“香”非彼“乡”。我起搿个名字,用意辣祝愿外孙女小“阿香”,将来拥有满满当当个花香搭书香。
时过境迁,随城乡一体化步子日益趋进,农村面貌今非昔比。老宅子已经夷为平地,上头盖起了老吃价个花园别墅,四通八达个马路从门前铺筑;大块农田开挖成碧波荡漾个人工湖,供南来北往游客踏青兜风白相。社区内吹拉弹唱勿绝耳朵,唰拉新个文化中心大楼气派十足,开设仔塔塔潽个娱乐项目,让阿拉开心来越活越年轻。小囡“阿香”,赶上改革开放好年景,真像伊阿伯所讲搿能,浑身“喷香”扎台型。勿仅人个卖相出落得花样漂亮,学问还抱仔个博士后学位。看到伊辣人前人后风风光光邪气精神,勿断有小伙子前来呈献红玫瑰或郁金香,向伊求爱愿意做上门女婿,我心里甜得像吃了蜜糖。
版权声明:
• 在本网站刊登的所有内容,包括但不限于文字、图片、音频视频、美术设计、程序及多媒体等信息,未经著作权人合法书面授权,不得进行一切形式的下载、转载或建立镜像。获得著作权人合法书面授权的,必须在授权范围内使用,使用时保留本网注明的“稿件来源”,并自负法律责任。凡注明为其他媒体来源,均为转载自其他媒体,转载并不代表本网赞同其观点,也不代表本网对其真实性负责。如果擅自篡改为“稿件来源:新民网”,本网将依法追究责任。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641111 021-52921234转 新民网 传真:021-62677454
邮箱:稿件处理 处理时间:9:00—18:00