讲讲打麻将

　　文/余国放

　　最近五星体育频道个“弈棋耍大牌”节目，扑克牌“欢乐三打一”收视率老高，迭个就是上海老百姓现在白相老多个“斗地主”。电视节目中个规则，术语也是阿拉老百姓辣白相中啥个“头撂摊打”“门板”“逼弹”咾啥，听起来好像有点俗，不过又老亲切个。特别是让阿拉老百姓也好凭着牌艺登上电视台个大雅之堂，迭个老早是不可想象个。

　　从“斗地主”我想到打麻将，我相信麻将大赛今后也有可能登上电视台，“斗地主”个历史绝不可能与有几百年历史个麻将相比。记得一个伟人老早讲过，麻将是除脱中医、《红楼梦》外，对世界个第三大贡献。麻将虽起源于中国，但现在辣日本、美国、澳大利亚老风行个，据讲辣日本大阪就有1800家麻将馆，交关国家还举行过麻将大赛。

　　辣拉极左路线风行个年代，老百姓个娱乐活动少了又少，啥个物事侪要贴上政治标签，上纲上线，麻将当然辣严禁查封之列，记得“文革”前夕，有一趟我阿爸被几位隔壁邻舍硬拉去偷偷摸摸搓了一次小麻将，呒没想到第二天厂保卫科就找伊训话（父亲是右派），还好迭几个隔壁邻舍侪是嘭嘭响个工人阶级，其中有一个绰号叫“猎狗”个爷叔是模子，伊立出来讲：是阿拉硬劲拉了老余搓个，勿怪老余个事，总算让伊逃过一劫。可惜父亲由于长期受迫害，过早去世，呒没赶上今朝个美好年代，否则伊完全可以堂堂正正，高高兴兴个白相几圈，安享幸福晚年。

　　麻将一般是四个人白相，最殟塞个是三缺一，辣国外生活个人，由于身居异国他乡，朋友圈子小，往往会碰到打麻将找勿到搭子个尴尬事，哪能办？有辰光不惜花钞票报纸上做广告，称某月某日辣某地召集搓麻将，有意者速来报名，有辰光登了广告还是凑勿到四个人，只好三个人搓“跷脚麻将”。看看人家辣国外人扎台型个一面，呒没想到也有苦涩，勿如意之处。

　　麻将是具有趣味性、益智性个游戏，涉及数学、逻辑学、统计学、心理性、博弈论等众多智慧。麻将通过摸、打、吃、碰、扛不断调整自己手中个牌势，最终成和，除技巧与战术之外，运气成分也较大，一般是三分技艺，七分牌运。麻将中一般采用“盯死下家，吃煞上家，看牢中家”个策略。但有辰光也要随机应变，声东击西，略施小计，让其他三家人家自相残杀，迭个叫斗智斗勇，当然自家和牌或保持不出冲或者不让其他三家和牌是硬道理。

　　麻将与其他娱乐工具（如扑克牌）一样侪有“赌博工具”“玩物丧志”个坏名声，哪能减少或规避搿种勿良后果，关键在于引导，单靠老早个禁止、处罚是行勿通个。刚刚故世个著名经济学家于光运曾讲过：“赌，是人的问题，不是牌的问题。”

　　比如今朝“欢乐三打一”，引导阿拉老百姓过五关斩六将，去做星级大师，让阿拉老百姓凭自己个智慧、能力以及运气去成为人家心目中个“明星”。搿种寓教于乐个好事体何乐而勿为呢！