“鼻拔笛达急橘”，侬会读伐？

　　——上海闲话里个浊辅音

　　文/丁迪蒙

　　上海闲话里有得完整个浊辅音，搿是老祖宗留下来个语言，辣吴方言区还老好个保存辣海。

　　普通闲话个基础方言是北方闲话，一般讲法里向已经呒没浊辅音了。搿种讲法我认为是勿对个。北方方言当中阳平声，俗称第二声，其实就是浊辅音。侬看：“鼻、拔、笛、达、急、橘、嘠”，搿眼字辣普通闲话里侪是第二声，请大家摸摸胡咙看，震动阿是比其他三个声调要重眼？

　　阿拉来分析分析看。鼻，就是上海闲话当中个“皮”个读音；拔，就是上海闲话当中个“牌”个读音；笛，就是上海闲话当中个“第”个读音；达，就是上海闲话当中个“大”个读音；急，就是上海闲话当中个“其”个读音；橘，就是上海闲话当中个“巨”个读音。嘠，就是上海闲话当中个“茄三胡”个“茄”的读音。所以，只要会得发普通闲话个第二声，上海闲话里向个浊音就会得发了。

　　再来看英文个发音。现在辣阿拉中国，学英文是全民侪要学个。所以，只要是学过英文个朋友就侪晓得浊辅音个。

　　上海闲话当中有交关浊辅音，所以反过来学外文也邪气便当。像我小辰光学英文，勿懂国际音标哪能办呢？老简单个，只要拿上海闲话读音写辣下头就勿会得读错脱了。比方讲：desk，下头就写“台四克”；door，下头就写个“逃”；zoo，下头就写个“坐”；音就差勿多了。

　　零九年，我辣韩国上了一年汉语课，勿会讲韩文就没办法出去买物事，所以就学了几句韩国闲话。学起来也老好白相个。韩国人叫侬进去买物事“欢迎光临”叫做“豪扫屋三摇”，“豪扫”就是快点个意思，搿搭上海闲话个意思是完全一样个。“屋三摇”就是进来个意思，我就记“豪扫到屋里向摇三记”。还有，累，韩语读音是上海闲话个“屁股难”，好，搿就用发音去记，一歇歇就记牢了。邪气好白相。