汤婆子

　　亦君/画

　　文/卢忠雁

　　汤婆子，伊个别名叫：锡夫人、脚婆咾啥。我看到个汤婆子，是铜质、锡质、陶瓷咾啥多种材质做成。迭个家生，是冬天介屋里向用来取暖个物事。

　　个头呈椭圆扁扁个，上头开了带螺帽个口子，烧开个热水，从搿个口子上头灌进去。形状为南瓜个形状，小口，盖子内有厣子，防止渗漏。冷天头，用汤婆子个辰光，拿烧开个水冲进去，再旋好螺帽，再拿伊放辣迭个用旧布头做个布袋里向，辣海呒没睏觉前头，摆辣辣被头里向。迭能介，夜里向钻进被头里向暖烘烘，睏觉来得个小写意。

　　辣海20世纪60年代，有一抢汤婆子一记头勿吃价了。辣末生头，塑料制品侪出来了，代替了汤婆子。讲起迭个塑料暖水袋，我瞎动气。侬晓得伐？老早头用过一只热水袋，眼眼叫有一日，塞头呒没旋紧，葛末睏觉睏到拨迭只老鬼三流出来个水烫醒，害得我个脚拨伊烫伤，到医院里去看仔邪气多个辰光，用仔交交关个药膏，慢慢叫好了起来。勿是我疙瘩，吃过了迭个亏，塑料暖水袋，迭个寿头刮气个物事，我一直就勿用了。前两日看到电视里向讲，迭个塑料暖水袋爆炸，拿一个人脚侪炸伤脱。如果伊抱了迭个塑料暖水袋睏觉，讲勿定弹老三了，多少危险啊！

　　有一日早浪向，我嘴巴干，就用汤婆子倒出来水，咕噜咕噜吃了一大杯。结果拨阿拉爷晓得吃生活了，伊讲：“迭个用铜做出来个汤婆子，里向个水，勿好去吃个哦。侬晓得?？开水搭仔铜、空气一记头会产生氧化反应。葛末，迭个铜一歇歇会变成离子个状态，人体吸收了后，少量个铜元素勿要紧；多了，迭个就会影响到侬个身体健康。”我小辰光勿晓得，到我慢慢叫长大，再晓得：阿拉爷是个工程师咳！迭个水勿好吃。倒脱肉麻【心疼】，乃末阿拉爷关照：倒出来个水，照牌头汏汏夜壶脸，是最好个哦！

　　想勿到现在怀旧风刮得结棍，有个地方汤婆子拨拉当作新娘嫁妆送出去。传统式样个汤婆子成为了工艺品。前几天看电视，有交关人侪辣海打听，上海啥地方还有买汤婆子？奇怪了，有一趟，我参加了一个好朋友个婚礼，到伊个新房间里一看：啥？汤婆子当陈列品，辣新房间里向摆奎劲，看看到勿觉得恹气。

　　我要拿迭个汤婆子个故事讲拔阿拉小囡听，要当伊个怀旧工艺品来收藏。到小囡结婚，摆辣伊个新屋里向，迭个汤婆子，就当作喜庆吉祥个“洞房饰品”。我想，一定邪好！

　　注:汤:热水。上海话当中保留个古汉语词义。例子:汤婆子，汤罐。