大考大白相，小考小白相

　　文/沈寿仁

　　2013年元旦一过，学生仔连牢上了八天课，接下去一个礼拜就是大考，弄得两个小囡读书是读得煞度【吃力】唻，真正是罪过【可怜】，罪过。记得阿拉小辰光读书，特别是读初中个辰光，大考大白相，小考小白相，搿个勿是讲自家小辰光哪能聪明，读书哪能来三，而确实是时代勿一样了。

　　阿拉读书个辰光，学堂、家长搭仔社会对小囡个要求呒没现在介高，压力呒没现在介大，再加上“少年不识愁滋味”，所以碰着考试，好像呒没啥个好紧张个。还有，平常辰光多多少少总归有得回家作业个，每天吃好夜饭也要垃拉廿五支光个电灯泡下头做功课，第二天好交差。碰着考试了，作业呒没了，第一堂考试，答完考卷交脱，就可以到操场上厾厾篮球，踢踢足球或者嘻嘻哈哈，做做游戏；第二堂考试考好嘛，就可以直接放学回去笃定白相了。

　　再有，埃个辰光苏联是“老大哥”，交关地方侪照搬苏联个一套，外语学个也是俄语，啥个特瓦利希【同志】、斯巴希巴【谢谢】、达斯韦达妮娅【再见】咾啥，现在侪派勿着用场了。平常作业搭考试打分也学苏联人实行5分制，5分优秀，4分良好，3分及格，2分就是开红灯了。只要考到大约摸现在个90分以上，大致浪就是5分了，所以好像勿要花忒【太】大个力气，学生手册浪向常庄门门侪是5分，灵光了勿得了。现在个百分制，勿好推板一分两分，勿见排名就可能落下去十几名，实在吃勿大消，现在个小囡个压力实在是忒大了。有一趟，我对我个孙子讲，阿拉老早是大考大白相，小考小白相，伊眼睛拨瞪拨瞪看牢我，弄勿懂是啥个意思，心想哪能有介好事体！