占位子

　　文 / 卢忠雁

　　老早到小菜场里买菜，迭个是桩大个事体。埃个辰光，菜呒没介许多，每家人家侪老把家【持家】个，勿做人家【节俭】勿来三。买小菜是个技术生活，老鬼点个“小钞票做多家生”，就是钞票花得要少，菜要买得质量好。

　　阿拉迭个菜场，从万春街小学到204弄个条弄堂为止。地方勿大，走走不过是20到30多步路个事体，卖肉、卖鱼、卖豆制品摊位各一只，其他几只侪卖蔬菜个。菜少就吃香；买勿着，勿是退招势，而是呒没吃了。葛末侪要老清老早去菜场排队。为了买好菜，阿拉几个小鬼头，侪是讲好一道去，好有个道伴。夜里向，拨好闹钟，闹钟一响，一记头跳起来，到弄堂里向喊张三搭仔李四一道去小菜场。乃末侬排蔬菜队，我排鱼摊个队，还有个要排豆制品个队。一分工，侪只有一只篮头，好了，约定成章：弄个稻草绳子搭仔小砖头，放辣海篮头前头，占只位子，到买菜个辰光，就可以理所当然地赶过来，赶过去。身浪向弄得汗滋滋，人搞得紧张来死，总算买好了几种小菜，吵相骂咾打相打咾侪有个，吃力哦。有一日仔，我买好了蔬菜，再到买豆制品个摊头去，稻草绳子搭仔小砖头侪拨人家踢脱了，人家勿承认迭个位子存在，讲我是插队个。我感觉到伊是吃吃我，一时头浪我火气大了，拉牢伊吵起来，阿拉几个小鬼头，帮我一道吵相骂，弄得队伍乱脱了。几个阿姨爷叔侪过来拉个拉，劝个劝，阿拉有落场势了，侪勿吵了。实际浪向，吃老酸事体是：几个老太太，夜里向弄了交关多个稻草绳子搭仔砖头，像扎大闸蟹一串，占了介许多个位子。常庄迭能介做，大家气勿过，侪联合起来，拿隔夜头个稻草绳子搭仔砖头侪掼脱了。迭个侪是辣海还呒没开秤（呒没到买小菜个辰光）个辰光做个，乃末等到伊拉来了，一看到迭个样子，豁虎跳：“小鬼头，做啥介结棍，弄得阿拉一只位子呒没了，迭个勿来三！”最作孽个事体是：2号周家小囡，伊要比我小好几岁，总归欢喜跟阿拉一道去买小菜。伊欢喜吃鱼，买勿起。轮到伊买鱼了，总归是2角2分个带鱼勿买；要买1角几分个带鱼，拨卖鱼个阿姨数落：“侬迭个小囡寿头刮气，买点鱼粘支疙瘩，我好心照顾侬，侬倒要买小个鱼。”实际浪向，周家伊拉爷娘侪是小工资人家，每日只有一眼眼铜钿买小菜，只好买??个小菜，是呒没办法个呀！有一趟，我定规要伊买大一点个带鱼，是我为伊付个铜钿！伊回转去讲，拨伊拉个娘骂脱一顿：介勿懂事体，买介大个鱼？过两天呒没钞票再买小菜了。伊只好编故事讲：“是卖鱼个阿姨搞错了，拨伊大个鱼当小鱼个价钿卖拨我个。”乃末总算逃过了一趟吃生活。实际浪向，周家迭个女小囡，我是瞎欢喜伊个，看到伊吃生活，就心里懊闷痛得难过。老早头我是捏鼻头做梦——要想讨迭个周家小囡做家主婆个呀。现在想想，老好笑个！