牵记老邻舍

　　文/潘庆云

　　路过复兴中路明园高级住宅区个辰光，我就交关牵记老底子1201弄个老邻舍。

　　迭个弄堂搿个辰光是中心城区个中档住宅区，我读高小到高中个辰光，阿拉一家门住拉埃面。住拉里向个人，有教师、职员、中小工商业主、牧师等。我觉着搿条弄堂里个风气比较好，从来呒没听见过夫妻反目、邻里纠纷咾啥个，吵相骂、打相打咾啥愈加呒没听见、看见过。人告人之间侪是和和气气个，呒没嫌贫爱富、趋炎附势咾啥个势利相。阿拉住拉30号个底层，人多房间小，光线又老暗个，只要天气好一眼，我就垃拉弄堂里做功课。弄堂里个爷叔阿姨看见我读书用功，老看得起我个。

　　40号里有一个退休个陆老师，老早子是留美学生，晓得我想学外文，就主动个教我读英文，勿但勿收我一分洋钿，还常常送文具拨我，勉励我长大了要争取做外交官。还有一个殷大哥，周末个辰光常常约我到伊拉屋里向听收音机里个钢琴演奏会、德累斯顿交响乐团访沪演出咾啥。同楼（30号）三楼个唐家伯伯邀我到伊屋里向做功课、听英语广播课咾啥；二楼个李家伯伯领自家个小囝去中山公园白相，总勿忘记带我一道去。当时，阿拉屋里比较贫困，但是大家看见我个爷娘老实，几个小囡争气，待阿拉侪老好个。因为家庭和睦，邻居对阿拉又关心，让我心里觉着老温馨个，学习告做小干部啦啥个社会工作啦，进步老快个。小学五年级参加全市个作文比赛，得了三等奖，初中辰光数学竞赛得过几次奖。初中毕业后考上了大家侪老羡慕个大学预科。后来阿拉搬走了，我进大学以后忙得勿得了，就不大去1201弄白相。

　　再后来，就是“文化大革命”，大家日脚侪勿大好过，呒没心思看老邻居，辰光一长，就失去了联系。现在，我已经七十岁快了，想起往事，总忘记勿脱1201弄个人搭事体。我觉着，我垃拉1201弄度过了人生中老重要个一段辰光，从埃歇辰光开始，我初步形成了比较健全个人格告阳光个心态。

　　1201弄个事体搭人，我永远牵记，永远感谢！