阳台浪向看风景

　　亦君/画

　　文/叶康

　　小辰光我住辣瑞金二路花园坊外北边个街面房子里。搿个是香港老板投资个三层楼洋房，淡枇杷色个，相当雅致。我屋里住三楼，朝西有一个阳台，大约三米多长，两米来宽，一米半高。南北两端个角都是圆弧形个。因为大人勿让阿拉小人下楼白相，所以搿个可以看风景个阳台就是我个乐园。

　　立辣阳台浪朝北看，瑞金二路一直通到淮海路。路口个西北角是大方绸布商店所在个六层楼。比伊更高个是上海滩浪顶有名个十八层楼——锦江饭店南楼，伊像巨人展开双臂要抱牢侬个样子。朝西看，是老大个绿树成荫个花园，靠北部是一个大操场。操场个边浪有好几棵三月份开个樱花，绿荫丛中露出造型别致个别墅个楼顶，有三棱柱形个、圆球形个、人字形个咾啥。留辣我印象中个，是对辣花园坊个大门口有三五个穿黄军装个配枪个解放军站岗。大操场浪常常有军人列队操练，做抓“特务”个演练。后来军人撤岗了，操场浪侪是穿蓝衣服、人民装个人，打球啊，做操啊。我问大人搿里向是啥个地方，伊拉也勿晓得。直到改革开放后，搿搭改为瑞金宾馆了，我再从一些资料当中得知，原来叫三井花园，解放前曾是日本洋行，解放后曾是华东局所在地。繁茂树林个西南面露出一排钢筋大棚，埃面是文化广场个大会场。上世纪60年代大型歌舞《在毛泽东的旗帜下高歌猛进》演出时，我辣阳台浪就能清晰个听到震撼人心个音乐声。

　　辣阳台浪望南看，一直可以看到打浦桥，看到我曾就读个卢湾中学操场旁个新中国化工厂高耸入云个烟囱。阳台下个搿条马路浪向，车辆川流勿息。依稀记得50年代我看到有载着头破血流伤员个卡车驶向我家南面个广慈医院，即瑞金医院。因为我屋里阳台西南角是马立斯花园，后来成为上海个国宾馆。勿少国家个党政元首侪光临搿个宾馆。立辣阳台浪，我亲眼看到陈毅市长穿军装陪同印尼总统苏加诺、刘少奇陪同苏联最高苏维埃主席团主席伏罗希洛夫、陈丕显陪同朝鲜首相金日成坐辣敞篷汽车里向，辣夹道欢迎人群中进入国宾馆。最隆重个辰光，瑞金二路搭复兴中路路口还搭起了五彩牌楼呢。

　　立辣阳台看天空，经常有飞机飞过。地处西南个龙华机场离我家也勿大远。印象当中，随着我年龄增大，飞机也越来越大，后来，巴基斯坦个大型喷气客机也飞来了，轰鸣声震耳欲聋。好在龙华机场已容勿下更加大个飞机，搿个机场后来也撤消了。