图 / 程多多
文 / 秦来来
阿拉小辰光,也就是上个世纪五六十年代,外地有亲眷来,除了拜望亲眷之外,主要个任务是:采购。因为搿个辰光物资短缺,而作为全国经济中心个上海,无论是轻工产品,还是日用食品,花色、数量侪是首屈一指。
到了上海,先是南京路兜兜,买眼时鲜货:五颜六色“大白兔”、玻璃糖纸太妃糖;牙刷牙膏香肥皂,毛巾面盆新糖缸;磨纱个连衣裙、新出个的确良;物事(东西)买仔交交关,大包小包装勿光。
挨下来城隍庙荡荡,淘点便宜货:墨水浆糊橡皮筋,铅笔簿子卷笔刀,扫帚畚箕揩台布,还有一对无锡货,男个是下巴底下有苏苏(胡须),女个是额骨头上皱纹多,头颈里向铜丝做,袅一袅、摇一摇,的的刮刮惠山脚下烂泥做个老老头和老太婆……
一趟子,我陪阿拉个亲眷南京路转来,刚刚坐下来,只听见伊辣末生头一记头叫起来,“皮夹子呒没了”!只看见伊哭出乌拉,一副胸闷个样子,我豪燥问伊,偷脱几钿?因为刚刚物事买好,皮夹子里还剩三、四张分(三、四十元)。阿爹拉娘唻,侬勿要小看搿个三、四十元,当时是一个工人一个月个工钿。伊发呴讲,“三、四张分买城隍庙五香豆,好买七、八十包唻(当时城隍庙五香豆五毛钱一包),分拨人家、人家勿要太开心噢!”
为了让伊开心,我讲,我带侬到大世界去白相。起先伊还勿肯,我讲,“侬放心,今朝我挺账(付钱)。”
“白相大世界”,也是阿拉上海人招待外地来客个王牌,就像现在来客人会带伊拉到东方明珠登高望远,再过两年或许就是带外地人去上海迪斯尼了。
到了大世界,两角五分一张门票。还呒没进门,就听到里向笑声勿断。原来门厅里向个12面哈哈镜,已经拿游客花得七颠八倒。
讲起来也真是“妖”,一个个人,勿关侬是小朋友、老老头,哪怕侬是身胚结棍个大模子,辣拉哈哈镜面前侪变成了面团团;哈哈镜就像一个技艺高超个大师傅,像捏面团一样,拿照镜子个人弄得来,一歇歇是凸肚挺胸,像只癞蛤蟆;一歇歇拔长身体,像根长缸豆;一歇歇五官分开,只看见眼睛寻勿着耳朵;一歇歇眼睛鼻头轧拉一筑堆,只有两只耳朵又大又宽,像猪八戒蒲扇耳朵辣招风……
照哈哈镜个人,侪摒勿牢,笑得来弯下仔个腰;有个人捧牢肚皮,伸出一只手点牢一道去个朋友,要想讲啥,偏偏只是笑,闲话讲勿出……一个个侪是痴头怪脑个样子!
我再看阿拉亲眷,伊也是弯下仔个腰,眼睛里向眼泪水嗒嗒滴,一面辣拉摇手,“吃勿消了,勿看了”!
我连忙拿伊拉开,到里向白相,因为大世界里向还要闹猛,歌舞、杂技、滑稽、戏剧……要啥有啥,就是一只民俗文艺个大超市。
搿日天,阿拉辣拉大世界里向,又是吃小吃,又是看戏文,再加一场故事片,还有交关小游戏,一直到夜里10点半,大世界打烊,阿拉两家头才神抖抖、心满意足个朝屋里跑。
我一直辣想,发明哈哈镜个人真是了勿起。直到现在,大部分去过大世界个人,当时辣里面看过啥个戏、吃过啥个点心,老早忘记脱了。只有哈哈镜,侪记了心里,勿会忘记。
实际浪向,哈哈镜是由伊特殊个镜面成像造成个:哈哈镜个镜面不是平个,有个部分是凸镜,有个部分是凹镜,告咾能使物像产生变形、变异效果,照起来奇形怪状,引人发笑。
我还一直辣想,当年从外国引进哈哈镜个辰光,一定勿是叫“哈哈镜”个,作兴叫“凹凸镜”之类个。但是到了上海、到了上海人个嘴巴里,变成了“哈哈镜”,几化生动、几化传神,真是顶脱了!
哈哈镜,承载了几代人个欢乐,也承载了几代人个记忆!
版权声明:
• 凡注明来源为“新民网”的所有文字、图片、音视频、美术设计和程序等作品,版权均属新民网所有。未经本网书面授权,不得进行一切形式的下载、转载或建立镜像。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641022 021-52921234转 新民网 传真:021-62677454
邮箱:稿件处理 处理时间:9:00—18:00