天平家园鹤翔航头朱家角古镇泗泾 今日九星宝山社区璀璨徐家汇定海家园科瑞物业湖南社区健康枫林今日虹梅今日练塘龙华社区曲阳社区庙行之声北站社区江桥报太平家园嘉兴天地美丽顾村和谐盈浦金泽报道康健社区走进广中
关闭
新民网移动客户端点击或扫描下载
您现在的位置:首页 > 上海闲话 > 老里八早 > 正文

私家车时代前个自行车

2013-12-30 10:31
来源:新民晚报        新民网编辑:田诗雍    作者:秦来来T | T 字号: 打印 参与评论(0)

  文/秦来来

  脚踏车,大名叫自行车,现在好像只有健身个辰光有人派派用场。讲起伊个身世来,大有来头。30年前头,全中国顶顶吃香个代步工具,就是脚踏车。当时大部分青年个工资是三四十元,而一部脚踏车个身价起码是120元左右,告咾啥人家屋里有部脚踏车,老海威个,勿亚于现在买部小汽车。

  “文革”结束前后,上海“永久”13型,是人人眼痒个紧俏货,克罗米龙头【把手】锃锃亮,锰钢车架贼骨硬,花鼓筒刹车顶时尚,双铃转起来乓乓响……搿个辰光,28吋锰钢、全链罩、双铃、涨刹、真皮坐垫、克罗米书包架,现在讲起来叫“顶级配置”。搿个车是当年最先进、最新潮个自行车,全国闻名,价钿大约辣180元左右。促掐个是,光有钞票还骑勿上搿部车,还要有购买自行车个票。当时分普通票搭花色票,拿到花色票个人,再好买13型个脚踏车。

  当时大部分该【拥有】车子个人,爱护脚踏车就像爱护本人个眼睛一样。每当休息日脚,用一个多钟头揩车子个,大有人在。讲起来侬勿相信,伊自家揩只面孔,最多两三分钟,常常连眼屎也呒没揩清爽。还有交关人自我规定,落雨勿骑。勿是怕自己淋湿脱,是怕脚踏车淋湿脱。还有人,买一眼彩色个塑料带,拿车身(三角架)一圈一圈细仔个绕起来,生怕上下车个辰光,皮鞋拿三角架浪个漆水蹭脱。

  还有极其少数个人,会拥有一部机器脚踏两用车。“文革”后期,当时“永久”生产出了一种“轻骑牌”机动脚踏车,大约每辆六七百元。相对而言,搿种车子个稀有威风个程度,远远胜过现在拥有“大奔”告“宝马”。

  踏脚踏车个姿势也老有讲究个,有一种“老侠客”,上车个辰光从来勿滑行,双手一捏刹车,左脚踏了踏脚板浪,右脚一偏,甩上坐垫。伊个坐垫放了最低,踏个辰光,两只脚摆成八字形,勿是用脚尖踏,而是用脚掌个中部来踏个。

  我当时辣拉电台上班,屋里住了控江路,每趟踏脚踏车从乍浦路桥下去个辰光,顶爽了:当时年轻,穿一件茄克衫,敞开衣襟,从桥个中央,沿牢虎丘路“刷”飞速滑行而下,两面衣袂飘飘,好像“大鹏展翅”。为啥寻虎丘路下去,因为呒没公交车通行,比较安全。

  脚踏车最靓丽个风景,就是男青年个自行车书包架浪带了一个大姑娘,左转右弯穿街走巷,算得上是上世纪七、八十年代个亮点,一眼也勿输拨现在坐宝马兜风。

  据我观察,男女青年谈恋爱,坐了脚踏车浪基本浪有三部曲:第一,叫正襟危坐型。男女青年刚刚认得,女青年坐了脚踏车书报架浪向,一般侪是横坐个(也就是右面个肩胛与踏车子个男青年成直角),一只手紧紧抓牢书包架,面无表情。第二,羞羞答答型。几个月以后,恋爱进行得蛮正常,搿个辰光,姑娘坐了书包架浪搿只右手,勿再是抓牢书包架了,而是抄了男青年个腰里了,面孔浪向略带微笑。第三,如胶似漆型。等到恋爱进行到成熟阶段,坐了书包架浪个姑娘调转身体,搭前头个小伙子成前后一字形,搿个辰光,姑娘张开两只臂膊,成箩筐式个紧紧抱牢男青年个腰里了,笑容里向写满幸福,再也甩勿脱了。

(新民网编辑:田诗雍)
今日热点

发布评论

评分:
 /  人已评
>>已有条评论

您还能输入140

查看网站地图

增值电信业务经营许可证(ICP):沪B2-20110022号 | 互联网新闻信息服务许可证:3112009001 | 信息网络传播视听节目许可证:0909381

广播电视节目制作经营许可证:(沪)字第536号 | 新民晚报官方网站 xinmin.cn ©2013  All rights reserved.

您还未登录
用户名:
密    码:
下次自动登录    找回密码
没有账号?    立即注册
新民网友:
评论成功

评论成功,谢谢参与!

点“看微博”查看您的上海滩微博

   

评论成功

评论成功,谢谢参与!