绞圈房子里好白相个地方

　　文/朱亚夫

　　上海真正个本地老房子——“绞圈房子”是老底仔上海滩浪个“大宅门”，告咾伊个公共空间邪气大，从墙门间、庭心（天井）、到客堂、后庭心等，侪是家族个公共空间，迭个就为阿拉小辰光白相提供了广阔个天地。

　　先来讲墙门间，伊勿是座墙，而是间房，是通往宅内个进口，家族当中碰到婚丧大事体，都要从墙门间进出个，所以一般迭头勿放家具，平常大家会辣搿搭茄山河，大热天则在此乘风凉。还记得阿拉墙门间个厢房中租住着一位宁波籍个裁缝师傅，长得胖墩墩、福搭搭个。伊常庄一边做生活，一边像“小热昏”一样，跟旁边头人说书讲故事。阿拉迭群小囡侪喜欢上伊搿搭串门，听故事。伊肚皮里货色老多，阿拉最爱听个是《薛仁贵征东》《薛丁山征西》《罗通扫北》咾啥，讲到精彩个地方，伊还会摇头晃脑哼唱几句，听得阿拉如痴如醉。受伊影响，阿拉几个小囡后来也学着讲起故事来。阿拉三四个人，躲辣墙门间个门后，坐辣用门闩搁成个长凳上，几个人轮流讲。为了讲故事，阿拉侪特地看了勿少小人书，还有民间故事、神话故事。有次，一位同伴讲了则《女娲补天》个故事，我和另一个伙伴竟担心现在

　　有人要是也学共工“怒而触不周之山”，天柱折断，哪能办？啥人来补天？两个人辣客堂里走来走去，想东想西，呒没个好办法，为此掼头搭脑了好几天——活式活样一副现代版“杞人忧天”个招势。

　　墙门间个后面是宽敞个庭心，面积大约有四五个墙门间大。庭心从名字就可猜到，伊是绞圈房子个中心地带，素面朝天，便于洗晒衣被，晾晒果蔬。大热天夜头，搬一只竹榻，摇一把蒲扇，在此乘风凉，嘴吃甜芦粟，眼望满天星，适意？阿拉就是辣搿搭学会了用甜芦粟做灯笼个窍门。读书后，阿拉经常约同学来绞圈房子一道做作业，迭里向勿要讲是四五个同学，就是来了十几个也能容纳得下。做完作业，阿拉就辣客堂间，或者天井里，搁上一块门板打乒乓。当时阿拉绞圈房子中出来个小囡，侪是学堂里打乒乓个好手。

　　庭心之后，就是大客堂，面积稍微比庭心小一点。迭里是家族做红白喜事、宴请宾客之地。大小客堂前有步廊，非常宽敞，可放小方桌，搿是家人吃饭、小囡做作业个地方。如果阿里家有了婚丧大事，绞圈房子中就闹猛煞了，庭院中人来人往，客堂间吹吹打打，一到夜里，汽油灯高悬梁间，拿老屋照得好像日里。记得1956年，我祖父去世，就辣客堂中设灵堂，再请上十来个道士诵经超度。经书是用双面宣纸装帧，有特制个牙签翻阅。客堂个墙浪，挂满了亲朋好友送来个挽联，白纸黑字，随风轻摇，至今记忆犹新。

　　绞圈房子公共空间勿仅阿拉宗亲使用，有时还被社会征用。上海解放前夕，阿拉绞圈房子住进了几十个国民党兵，军官住辣厢房，小兵挤住墙门间、客堂中，每天喧闹勿断，让阿拉着实心惊肉跳了一段日脚。以后随着解放个炮声逼近，搿些国民党兵树倒活狲散，枪弹好些就掼辣河浜中。