牛奶馒头

　　文/曹振华

　　馒头是大家欢喜个大众化个粮食，伊个品种勿少，譬如讲刀切馒头、玉米馒头、高庄馒头咾啥，侪是呒没馅子个，而我搿歇讲个馒头名字就叫“牛奶馒头”。

　　上世纪七十年代初，我从农场上调到江宁路浪牛奶公司乳品厂上班。进厂后看到食堂里有勿少职工侪勒垃用饭票买馒头。搿个馒头雪雪白喔，是圆个，热气腾腾。我也买了一只尝尝看，馒头勒散发一股浓浓个牛奶清香味道，蛮甜个，又松又软，真好吃。伊像煞是面包，但又勿侪搭面包一样，面包是西式面点，而馒头是中式食品，用中式食品，掺进牛奶，拌面粉发酵，蒸了馒头，倒有点中西合璧个味道。厂里人侪叫伊“牛奶馒头”，侪欢喜买了吃，还要带转去拨屋里向子女爷娘尝尝，吃牛奶馒头个味道勿亚于大饼油条。

　　葛咾爷娘搭兄弟姐妹吃了后侪讲：“好吃唻！”隔壁邻舍听到后，也老有兴趣，要我也带拨伊拉尝尝味道。我就经常带回牛奶馒头，拨拉左邻右舍分享。迭个牛奶馒头也成了我厂里除了鲜牛奶、可可牛奶、炼乳、奶油产品之外，又一个特色产品，不过当时搿种馒头是勿对外供应个，只对内部职工专用。搿个辰光牛奶供应老紧张，订牛奶真勿容易，要具备婴儿出生证明、重病症人、高龄老人、动过大手术等等条件侪有订。乃末牛奶馒头就成了时髦货，呒没条件吃牛奶个人，尝尝牛奶馒头也算是沾点牛奶个光了，牛奶馒头个名气也传出去了。

　　进入改革开放年代，牛奶馒头也来个“内销转外卖”，摆上了柜台，正式对外“亮相”。之前通过厂里职工关系尝过牛奶馒头个老吃客，听到后，豪燥赶过来买馒头，经济实惠个牛奶馒头供应一下子还蛮紧张个。厂里做馒头个师傅们加班加点，更加来劲了。

　　我已退休，吃吃市场浪向迭个馒头，伊个馒头，我还是常常回想起埃歇辰光牛奶供应紧张，牛奶馒头“吃价”个场面，邪气感慨啊！