钞票赚了看哪能用

　　文/史舒薇

　　假使有位收入好算算个朋友，嘴巴里老欢喜叫“碰头聚餐”，饭桌上是大家个中心，谈天说地，浪头高，但是等到“付铜钿”个要紧辰光，声音倒迓迓叫低下去了，头也慢慢叫别过去了，手垃袋袋里摸来摸去，结果，老兄挖了半天只挖出了一块让朋友煞风景个绢头来，钞票是闭口勿谈，捱到后来倒喊大家“劈柴爿”，搿种腔调，人家就会朝伊白斜眼。直爽个人会当面开销伊：“叫了半天吃饭，只懂公款买单，哪能介抠”、“小气鬼”、“呒没派头”、“算来西”、“勿上路”、“抖抖豁豁”、“狗屄倒灶”。上海人用词褒贬分得煞拉势清【清楚不含糊】。会讲闲话个，干脆用歇后语讽刺伊“跳蚤放屁——小气”、“铁公鸡请客——一毛勿拔”，封伊做上海滩上头号“精算师”。

　　滑稽个是，下一次碰到人家请客，伊会面皮老老，带仔老婆双双出席，垃伊心里从来勿肯吃亏，多捞一票是一票。搿种只晓得“铜钱眼里翻跟头”个先生，眼睛除脱盯牢两张人民币以外，还能跟朋友做点啥？大家上当一次，彻底“拗断”拉倒。上海闲话还可以垃动词、形容词后加上个尾巴（后缀）“……头势”，来夸张形容搿类人个刮皮程度。比如：“哭头势”、“精头势”、“推扳头势”、“蹩脚头势”等等。反正只要跟“吝啬鬼”稍微搭点边个贬义词，统统侪会寻出来，厾【扔】过去，叫伊吃勿脱，兜了跑。上海人还用更加生动个“磁性”拟声词来形容，“伊哪能介哭出乌拉？”忒“鸭屎臭”了！更加勿客气个触霉头闲话还有来：“算进勿算出，生意做勿大”、“算来西，算煞死【xi】”。文学修养好点个人还会“锄头刨黄连——挖苦”一句，“21世纪现代版个周扒皮”，“葛朗台重新投胎，碰得着”。

　　倒是晓得有出手慷慨者。2008年汶川地震后，上海退休女教师沈翠英绝对“大手笔”，拨自己个房子卖脱，450万巨款全部捐拨灾区人民。2011年又继续做好事，宁可自家折本，也要帮助伊面个老百姓卖脱积压个猕猴桃，还垃都江堰办起了猕猴桃产业园区，大家侪竖起大拇指说，好事做到底，“勿得了”、“邪气了得”。本来花样经蛮透个上海闲话，一时浪向倒像变得单调、文雅、味道淡下来了：“大方”、“乐开”、“量气大”等等。介多漂亮闲话用上去，好像程度侪勿够到位。上海人就会套用磁性个拟声词来形容：“刮拉松脆嘭嘭响”！老百姓评论：钞票赚得多啥稀奇，要紧看伊哪能用！关键辰光上海人出手哪能？像样伐？漂亮伐？气量勿是一眼眼。吨位结棍伐？立升大伐？砖头重伐？七位数，出手挺括伐？一点也勿摆噱头，勿开玩笑，硬碰硬个！

　　顺便谈谈小姑娘轧朋友、寻对象，往往会用“出手哪能”来衡量一个男人个修养、素质、责任、气度。但是有辰光，噱头势太多，花来花去，一时浪向，云里雾里，看大勿透。男女双方碰头约会，看电影，荡马路，吃大餐、掏腰包……男方勿需要装腔作势个“佯小开”、“充大款”、“掼派头”、“大手大脚”，不过就是抢先一步会钞而已。假使啥人碰到真正个困难、灾情、意外……所有想勿到个事体突然发生了，葛末，该承诺时就承诺，该出手时就出手，女方肯定会觉得搿个男人是个“模子”，像个“大丈夫”，欣赏伊腔调好，底气足、靠得牢。至少勿是伊种“小家败气”粘滞疙瘩个“奶油小生”，嘴巴里整天嘀哩哆落，手里只会捂牢自己袋袋，心里斤斤计较个算东算西，眼睛盯牢周边一圈，生怕落脱了啥物事一样，让人看勿起，勿适意。讲得难听点，有辰光还真会叫人浑身起鸡皮疙瘩，真正难过煞脱。