七十年后重相会

　　文/凌淑平

　　自从本版刊登了我个《新城隍庙个良友照相馆》一文以后，上海有交关人怀念起拨自家带来老多快乐个新城隍庙来。责编转来了一位78岁高龄戴伟民老先生个亲笔信，讲自家1947年“在100号的大用无线电行当学徒。文章作者如是女性，那肯定是凌维熊的长女。”伊讲当年还抱过我。

　　最叫我惊喜个是隔壁101号良友照相馆个大儿子唐俭先生看到文章，通过责编寻着了我，伊搭我通了电话，搿个是晏到了七十年个电话，当年阿拉一岁勿到一道辣良友合拍一照，想勿到现在又好碰头了！前些天是阿拉两家头虚岁七十生日，电话里商定一道过。搿日，阿拉两家各有三兄弟加上我等一道见了面，还请来了发小钱乃荣教授。阿拉侪带来了勿少老照片。看了旧照，回忆往事历历在目。双方个父辈侪是勤奋勤俭创业。唐俭爸爸拿良友影迷社经营得老好，后来良友还开到了重庆中路太和里北面，滑稽演员姚慕双、周柏春搭越剧演员戚雅仙侪请得来拍照，影迷、戏迷来了交交关关。到良友拍二寸报名照，就可以拿到一张姚或周个“结婚照”。影迷社后来改名照片公司，公私合营后店面搬到新城隍庙正门右侧，后来成为淮海中路老有名气个“海影图片社”。伊爸爸还参加民建个工作，母亲辣福州路西藏路口个“上海摄影图片部”工作到老。唐先生大学毕业后去了黑龙江工作。我个爸爸解放前开了一爿光大织造厂，当年为了抵制美货，自家研制了印刷用布水胶绒等，辣上海影响颇大。解放后伊一直是政协委员，1963年伊让我带头到新疆去参加建设。唐先生搭我两人分隔辣祖国北部边陲，一个东、一个西。后来“文革”动乱，打断了老人之间个联系，半个世纪大家呒没了音讯。改革开放以后，我搭丈夫从新疆回来，唐先生也调回到上海电力学院任教授。古人已逝，后辈今朝侪还辣勤奋工作。多亏了晚报个深远影响，使得两家人恢复了联系。

　　相见个话题当然离勿开新城隍庙个旧事。日本人侵入南市以后，租界里个上海百姓勿便去城隍庙烧香，明星制片公司导演张石川等几个文化人从南市请来了一尊城隍菩萨，筹划辣今连云路一带造起了新城隍庙。阿拉搿日侪带来了1949年出个上海新城隍庙个详细地图，上面有阿拉100号、101号位置，就住辣城隍殿个对面。平面图浪有新城隍庙个城隍殿搭仔周围个交关商店位置及其名称。唐先生还带来了良友拍个新城隍庙大殿个照片（见附图），地图当中还有一埭老长个“百花厅”。搿个辰光个新城隍庙是个小社会，人丁兴旺、邪气闹猛，样样物事侪有得买，新城隍庙里个店面清清爽爽，勿准许乱设摊头，只有沿马路有一点卖花鸟、杂物个地方。新城隍庙比别搭更加有点文化色彩，譬如文具店格外多，还有乐器店，马头牌颜料搭仔口琴专卖店咾啥。钱教授还讲，整个50年代，伊最欢喜去个地方，就是新城隍庙，买花买树苗、买文具游戏棋香烟牌子搭仔连环图画、明星照片。