迭个一座庙啊

　　文/马尚龙画/桑麟康

　　几乎可以搿能讲，唯一一座让小小人自觉自愿、而且还吵了要去个庙，葛就是老城隍庙了。从来呒没想过老城隍庙也是庙，搿也怪勿得小朋友个世俗。比起其他庙宇个宗教召唤和仪式，老城隍庙好像很早已经淡化了城隍神及其道观色彩。伊也有初一十五个活动，不过更世俗个是伊个每一天，尤其是周末假日。某年灯会，人流最最轧个辰光，已经要采取截流，以防意外……

　　啥人也勿会怀疑搿是辣讲老城隍庙，就像啥人也勿会怀疑搿是上海老城隍庙。曾经有搿能被公认个说法，“呒没到过老城隍庙，等于呒没到过上海”。勿必说如今个老城隍庙已经是全国著名个旅游景点，假使辣九曲桥上挤兑，听到个基本上勿是上海话，即使是辣旅游还勿发达、上海还呒没900万非本地户籍人口个年代，城隍庙里也是各地方言辣愉悦穿行。老城隍庙一直是上海交关金字招牌中个一块，就像杭州个西湖，北京个香山，厦门个鼓浪屿……具有勿可复制个唯一性。

　　事实上，搿是大众误解了上海老城隍庙，或者说，是上海老城隍庙误导了大众？城隍庙从来勿是独此一家，城隍庙发祥地勿辣上海，城隍神个故事也勿是流传辣上海。至今全国个城隍庙略有名气个还有五六十座。西安都城隍庙，已有620年历史，辣城隍信仰个序列中，级别最高、影响最大。明代散文家张岱笔下个吴山城隍庙则是坐落辣西湖边。台湾也有城隍庙。上海个老城隍庙只是城隍庙中个一座，就城隍庙本身来讲，还略显平凡，可是至少辣旅游者个选项中，上海个老城隍庙，才是像西湖香山鼓浪屿一样，具有ONLY ONE个意义。

　　上海人又何尝勿是搿样？啥人侪晓得，啥人侪去过，连英国女王伊丽莎白二世和美国前总统克林顿，都辣老城隍庙湖心亭品尝过绿波廊个点心，上海人哪能会勿去轧轧闹猛？如果做一个调查，问问寻常个上海人，去过城隍庙伐？伊一定说去过，但是伊讲个肯定仅仅是上海个老城隍庙，而勿是全国各地个城隍庙。

　　至今还能回想起来紧紧抓牢大人衣角，就为了去吃宁波汤团或者南翔小笼或者豆腐花……千万勿要以为是现在，要达到搿个目的太容易，辣让人刻骨铭心个1960年代，老城隍庙个小吃与零食简直可以让一个小小人魂牵梦绕。葛必须是戴上了红领巾、功课全是五分之后个重大奖励——对于小囡来说，“老城隍庙”是一个有太多太多好吃东西个地方。如果从商业文化角度探讨，老城隍庙开创了旅游小吃个先河，只是呒没一个当下个旅游小吃，会达到老城隍庙个境界。

　　为什么会是抓紧大人个衣角？因为老城隍庙永远人挤人，一个转身都勿晓得会转到了阿里。去之前，大人便会关照，勿许乱跑，大人还会对小孩子说，啥人啥人就是呒没搀牢大人个手，拨人家拐走了，汤团呒没吃着，苦头要吃煞。为了吃，大人个训诫也就记住了。事实证明，大人也并非是吓小囡。某家电视台常播寻亲节目，有个老太太回忆说，当年就是在老城隍庙，辣柜台前付钞票，一松手，小囡走呒没脱了，再也呒没寻到……老城隍庙出口四通八达，当年也呒没监控探头。为什么勿是拉了大人个手而是抓紧大人个衣角？有讲究。小小人身高欠缺，拉大人个手拉不住，况且，大人去城隍庙是要去买东西个，买吃个，也买用个，两只手已经腾勿出来，衣角才是最理想最安全个挂靠。