我个一身“童子功”

　　文/丁婷婷

　　上世纪70年代我辣商店工作，要吃三年“萝卜干饭”。第一年工资17.84元，第二年工资19.84元，第三年工资21.84元。满师后36元。搿个三年让我学到了交关技能，像“包三角包”“扎老酒瓶”“心算”咾啥，打下了扎实个“童子功”。更想勿到个是，搿点“童子功”能让我终身受用。

　　第一功是扎蛋糕盒子功。搿个辰光“毛脚女婿”上门行送未来丈母娘“炸药包”，其实就是送一盒蛋糕，蛋糕盒子有方个、圆个、扁个，要拿搿只蛋糕盒子扎好，让人家拎起来方便又好看，又勿好散脱，搿个功夫还是要练一练个。想勿到搿个功夫我现在还能派上用场，比方讲，阿拉现在去饭店过生日会吃蛋糕，多数勿会侪吃光，吃勿光个蛋糕还会放到盒子里带回去，旁边人就会讲：“哎哎哎，侬来帮忙扎扎蛋糕盒子。”我当然是义勿容辞。

　　第二功是算盘功。我个算盘打得又快又准，还曾经参加中心店青年技能比赛。想勿到搿个算盘功后来也派上了用场。80年代，电脑还呒没普及。我执教个《大学语文》搿门课是市统考，市统考结束后，几十只学堂考试个成绩侪要登录，乃末只好靠手工登录。外加，最后结分统分个辰光还要算出每只学堂每只班级个平均分。搿个辰光，市《大学语文》组组长总归要用一用我个算盘功了。我是大显身手，噼噼啪啪一加一除一算，比伊拉用计算器还要快搭仔准，面孔浪向相当光彩。

　　第三功是拣西瓜功。老早仔辣店里向阿拉侪要学哪能拣出好西瓜。搿个功夫主要是看搭仔听，先看瓜个皮色、形状、蒂度，还要听拍瓜发出个声音。好西瓜纹路要清爽，蒂度要凹进去，声音要脆亮。学了搿一手，从此阿拉屋里向买西瓜个事体侪是交拨我哉。我先生有辰光勿服气，伊也要去买。不过伊买来个西瓜勿是忒生就是忒熟了。我儿子开腔了：“哦哟，阿爸，搿种西瓜侬去吃哦，阿拉是勿吃个。”我去店里买西瓜，店里个MM或DD总归是抢着要帮侬拣，我一把拉牢伊，我勿要那拣，我自家来。拣好之后去称分量，搿点人侪会拍两记，有点勿大相信个朝我看看，但拍下来个结果总归让伊拉服帖。搿个辰光我就会得意个笑着搭伊拉讲：“搿个是我个‘童子功’，嗨，我老早是卖西瓜出身个！”