【闲话闲画】想念药胡翅药史太

　　文图/阿仁

　　立夏过脱了。芒种也过脱了。依照古书上讲：“芒种至，蝉始鸣。”蝉，通俗个叫法为知了。只因为伊叫起来个声音与“知道了”相近。上海人把知了称为“野胡子”。上海闲话从来就是拨上海人讲个。要把上海闲话写出来、写下来，从上个世纪30年代以来就有各种各样个版本。眼门前由钱乃荣、许宝华、汤珍珠三位学者所编纂个《上海话大词典》收录了一万五千多条上海闲话个词语，可以讲是尽可能个把写下来个上海闲话进行归纳规范了。这本词典里把“野胡子”写成“药胡翅”，我也同意。

　　阿拉是讲讲上海闲话个人，也够勿上是研究上海闲话个人。反正写了个上海闲话能拨上海人弄得懂就可以哉。

　　大热天里停辣树梢上还会一息勿停叫个类似于药胡翅个蝉是药史太。上海人称伊为迭个名称也因为伊叫起来是：“药死它———药死它———”药史太要比药胡翅小一点，身体是青绿颜色，而勿像药胡翅伊样颜色是黑个，还黑得油光亮，够神气个。

　　阿拉小辰光辣暑期里去捉药胡翅告药史太是一桩老开心个事体。要爬到树上去捉牢伊拉是不可能个。只有两个好个手段，一是“搭”、一是“弹”。“搭”，粘也。准备好一根长竹头，越长越好，辣细个一头粘上“面筋”，以“面筋”来搭牢药胡翅。面筋是自家做成个粘合料，用黑面粉用水调和后反复捏反复和。合格个面筋就像现在个口香糖，拨伊搭牢之后挥都挥勿脱。做好迭根长枪武器之后，就可以去寻迓辣树梢上、树叶后个药胡翅了。寻到了，看准了，伸上竹竿去搭住叫得正开心个药胡翅。至于“弹”就便当多了。一只弹弓，一把子弹，以命中率取胜。子弹考究一点也自家做，用烂泥搓成小丸子晒上几个日头就成功了。中了弹个药胡翅、药史太一声长鸣就跌下来，再也飞不走了。虽然迭个辰光个男小囡侪会自制大小弹弓，但老师与家长侪要收缴伊。危险武器，弄勿好要闯祸个。我至今还珍藏了一把橡皮筋木弹弓。搿是我儿时个记忆。

　　辣热中心看到马路上一群皮小人辣行道树下东张西望，搿就是当时个捉蝉部队了。现在看勿到了。因为侬早已经听勿到城区里有夏蝉个长鸣了。城市个水门汀里生不出药胡翅和药史太了。药史太终究呒没药死别人家。伊拨高楼大厦药杀脱了。想念迭些带来夏趣个小虫：“药死它———药死它———”