今日空气质量  
天平家园 鹤翔航头 朱家角 古镇泗泾 今日九星 宝山社区 璀璨徐家汇 定海家园 科瑞物业 湖南社区 健康枫林 今日红梅 今日练塘 龙华社区 曲阳社区 庙行之声 北站社区 江桥报 太平家园 嘉兴天地
您现在的位置:首页 > 上海闲话 > 头条 > 正文

【闲话闲画】上海人欢喜乘风凉

2013-07-29 10:09
来源:新民晚报          新民网编辑:田诗雍    作者:阿仁 T | T 字号: 打印 参与评论(0)

  文图/阿仁

  上海人欢喜乘风凉,辣大热天里。辣上海个旧城区告老城厢呒没改造之前,大多数个上海人轧拉一道——一条十几只门牌号头个弄堂里可以住进几十甚至上百家人家。住个面积小、住个人头多,碰上三伏天,大家热煞。于是上上下下、前前后后个人家一到吃夜饭前后就侪情愿到大弄堂里、到小马路浪去乘乘风凉。考究一眼个乘风凉事先要做准备个,拎出几铅桶个自来水先把马路个柏油路、或者把弄堂里个水门汀路、石板路冲洗一番。冷水个蒸发会使局部范围里降温勿少。前人浇水,后人乘凉。乘风凉个先头部队常常是一家人、几家人搬出桌椅、搬出饭菜辣此用起夜饭。辣马路边、弄堂里吃夜饭供邻居们、过路人观摩常常会引起小小个闹猛。“萧山萝卜干炒毛豆下饭!”“用酱瓜来炒味道更加好!”“冬瓜汤里还可以笃点笋干……”“咸蛋要去买苏北高邮个……”看个比吃个积极性更高,大家七嘴八舌,有点像现在电视里个厨艺大赛。

  天色暗下来了。路灯亮起来了。乘风凉个大部队陆陆续续尽数到场。男女老少、拖儿带女个房客们侪搬出了凳椅来占领上风头。小矮凳、长板凳、竹椅、竹榻、篾竹躺椅、帆布躺椅甚至红木太师椅都掮出来了。讲究一点个老先生还泡来了大麦茶、龙井茶,请邻居们大家吃一杯。乘风凉个人常常有几个分中心。阿姨妈妈聚辣一道讲东家长、西家短。爷叔阿爸凑辣一道着几盘车马炮象棋。打扑克牌个一桌朋友常常会扫兴收摊个,因为夜风大个辰光伊拉是捉不牢小台子浪个一堆纸牌个。当然,乘风凉里最最开心个是一群皮小囡。侬迓到东、伊迓到西,辣人堆里白相捉迷藏。少不了有拨爷娘捉牢了吃一顿排头个:“刚刚淴过浴清清爽爽个,现在背心浪又湿答答了。要吃生活啊?”大人骂过山门之后,皮小囡们会识相一段辰光。女小囡更欢喜听鬼故事。拨伊拉盯牢个老娘舅只好答应再讲一只:“……经过外围坟山,半夜里,突然窜出一只吊煞鬼,红眉毛绿眼睛,要扑上来哉……”小姑娘有尖叫起来个,有捂牢耳朵个,更有拔脚开溜个。老娘舅趁势收篷:“吓煞了?葛末明朝再讲了、明朝再讲。”

  夜半时分,大家散伙。“早点困觉,明朝还要上班读书!”生活辣继续。上海人个生活方式已经大大变化了。搬进新居、住进小区个上海人不再到室外去乘风凉了。热天里上海人乘风凉个习俗像一张风俗画片正辣渐渐褪色,渐渐隐去。不过,我还是有点怀旧个。伊毕竟是阿拉老上海人个一段记忆,又火热又风凉。

(新民网编辑:田诗雍) 
今日热点
更多关于

上海人

乘风凉

的新闻

发布评论

评分:
1 2 3 4 5
 /  人已评
>>已有条评论

您还能输入140

  • 数据加载中……

微访谈

微言博议

微辩论

投票成功 “做民调 赢大奖”转盘抽奖 科沃斯地宝、交通卡、面包机、数码礼包、象印保温瓶等百份奖品等你拿 去试试手气
您已投过票 “做民调 赢大奖”转盘抽奖 科沃斯地宝、交通卡、面包机、数码礼包、象印保温瓶等百份奖品等你拿 去试试手气