【闲话闲画】“万宝全书”个烟纸店

　　文图/阿仁

　　老上海个大小马路、长短弄堂里曾经“迓”着成百上千家个烟纸店。之所以讲“迓”是因为迭点烟纸店勿但小，而且从来就勿大张旗鼓个装潢店面、更新店招。交交关关个烟纸店好像从来就呒没起过店名。我住过个康悌路浪百步之内就有好几爿烟纸店，大个一爿被大家叫成“大麻皮”店，小个一爿被叫成“小麻皮”店。其实两爿店个老板虽然上了年纪，但面孔浪是一点麻子都呒没。康悌路辣解放之后改了路名，叫建国东路。东起肇周路，西至重庆路，马路勿长，总共勿到六百个门牌号头。

　　上海个烟纸店要辣北方应该被称作杂货铺。烟纸店通常只是一个门面，更微型个只有半个门面。烟纸店里卖点啥？可以讲一家人家日常过日脚所需要的大小用品，伊侪能够供应上来。肥皂、草纸、牙刷、牙膏，针针线线、宽紧带、橡皮筋，各种钮扣、大小揿钮，刀片、剪刀、长短钳子，灯油、蜡烛、自来火，纱绳、麻绳、皮鞋带、跑鞋带，木梳、头绳、生发油……要能够报全烟纸店里个全部货色，只有去请唱独脚戏个滑稽界演员了。

　　烟纸店里最好个生意当然是卖香烟了。香烟牌子品种齐全勿用讲，香烟还能够拆零来卖。飞马牌香烟贰角捌分一包，劳动牌香烟贰角贰分一包。侬摸出五分铜钿，就可以买到两根飞马、两根劳动牌香烟。烟纸店老板个生意经是既精明又活络，精明到一分一厘大家不吃亏，活络到随意组合只叫侬适意。

　　烟纸店里最多个常客就是左邻右舍个小朋友了。烟纸店有文具供应，练习簿、笔记本、铅笔、橡皮、信纸、信封、直尺、短尺、三角板、回型针、图画钉……上了学、读了书个中小学生勿必专门去文具商店，跑跑烟纸店就可以了。吸引大小囡、小小囡去烟纸店，还由于店铺里有各种糖果，各色干点和棒冰、雪糕辣等牢伊拉。棒冰四分一根，断了棒头个叫断棒冰，就卖三分洋钿了。烟纸店个保温设备是广口保温筒，用来装冷饮。所以只记得老早仔个棒冰、雪糕上了口侪软绵绵个，勿像现在从冰柜里拿出来个伊能硬扎。

　　过去个烟纸店大多数是夫妻老婆店。店堂很小，甚至呒没。前店后家，前面做小生意，后面住进一家门。老板醒了就开门，困了就打烊。一年到头纸烟店都开张接客。就是过年，年卅和年初一都开门大吉，卖大红对联告大小炮仗，显得喜气洋洋、年味十足。

　　上海滩浪还有原汁原味个烟纸店吗？搜索中。呵呵。