【闲话闲画】赎药、煎药、药罐头

　　文图/阿仁

　　上海人称西药店为药房，称中药店为药材店。当然，对于大名鼎鼎个中药店就直呼其名了：“徐重道”、“童涵春”。旧上海个中药店勿勿少少，后来都公私合营了，但老个店名基本浪都得以保留。我老房子弄堂口个一爿中药店双开间门面，大号就叫“大德生”。

　　药材店中式装修。店门居中，上悬横匾，黑地金字，由名家书写店名，还以一方红印点缀。店堂里两厢侪是曲尺柜台。柜台后面是一排高柜，由几十只大小等同个抽屉组合。抽屉里便是各式各样个中药材，飘出各种各样个香味。搿使药材店有一种安定感觉，还有一丝神秘色彩。店堂里还会有一堂或者半堂红木家具供顾客小坐。要晓得抓药配方辣中药店决勿会急就章。等勿及个朋友可以留下方子，到药材店打烊之前来取。

　　北方人叫抓药，上海人叫赎药。我呒没研究出啥个成果，为啥道理中药一定要讲成赎药。赎，当铺里个专业闲话。我有点疑心这“赎”字是否有继续个意思。吃中药来医病、调理总归要有一长段辰光。续，接连不断是也。药材店不但卖药配方，还可以代客煎药熬药。店堂个后面就生着交关煤球炉子、煤饼炉子，用来为病家煮药。上海闲话里呒没“煮药”、“烧药”，只讲“煎药”。假使要煮成更浓个膏药，就叫成“熬药”。虽然代客煎药熬药侪要收点费用，但价钿勿会太大，普通人家侪承担得起。老里八早个药材店里还会有中医个医生，号称“坐堂郎中”。后来上海个大医院里开出了中医科，还开出了中医医院，私人行医就行勿通，关脱了。开药材店个杂家多半侪懂得点医道。就是店堂里个老伙计由于天天读方子称药、配药，也就能为小毛小病个老顾客或者周围个邻里出点吃药个点子来。所以街面浪、弄堂里个熟人有闪了腰、伤了筋个，小小囡有发了痧、生了疖子个就懒得跑医院，就到药材店里去赎点药、买点药膏来解决问题了。

　　煎中药要用砂锅瓦罐。三月两头生了毛病去吃中药个，弄成慢性病要常常来靠中药调理个，搿样个朋友上海人就叫伊拉为“药罐头”。有了“药罐头”雅号个倒也省心省力了，单位里要是有重生活、急生活，领导、同事勿会去差“药罐头”出马个。

　　上海滩浪老个药材店已经难觅踪迹了。倒勿是上海人勿相信中医，实在是因为中药是“慢条斯理”，看医生、看毛病大家侪想“立竿见影”。到了医院大家侪是急性子。吃药打针大家侪想抢跑道。头痛脑热个小病侪要争取去“打滴”，慢节奏个药材店只好上排门板打烊哉。