文图/阿仁
自行车,上海人称伊为脚踏车。大多数人侪会骑脚踏车。就算现在,我相信勿会踏脚车个朋友也要比会开汽车个人少。老早上海人屋里向多多少少会有一辆脚踏车。弄堂个过街楼下,屋里个天井里,楼梯下个角落里都是大家停车子个地方。伊个辰光假使弄堂有人被偷走了一辆脚踏车,肯定可以算是一桩大案了。里委干部、户籍警要来走访调查,一定要捉出迭只贼骨头来。上海生产个脚踏车是全国个名牌——永久18型、凤凰13型。小青工上班工作之后买一部永久、凤凰脚踏车来踏踏,伊个风光程度不亚于现在小白领开一部奥迪、本田。
我高中毕业个当口是1966年热天。我借了一部同学个“老坦克”。上海人把又破又旧个脚踏车叫做“老坦克”,车子上样样会响,就是铃勿响。要好个同班同学杨吕冰问体育老师张先生借一部脚踏车:“阿拉到淮海路去买点文具,踏车子去,一两个钟头还车子拨侬……”张先生爽气:“当心点,覅闯祸!”阿拉两个原本是想去复旦大学看看大字报个。一上路就突发奇想,难得有搿样个好机会,踏脚踏车到苏州去,到苏州观前街去白相白相。一切都呒没准备过,两个人袋袋里也只有几块洋钿。管伊了,开路!搿是第一天下半天个两、三点钟。先踏到了曹家渡。从曹家渡到安亭是一条曹安路,柏油马路,一路飞奔,一点勿吃力。到了安亭,买了几只大饼充饥,又继续上路。天终于黑了。踏上了上海到苏州个公路,勿是柏油路了,是有点坑坑洼洼个石子路了。公路上呒没路灯,一团漆黑。借着夜色,隐隐约约可以认出一条灰白个公路来。阿拉是闷头踏车子,拼命踏车子。终于饿了,渴了。寻到离公路勿远个农民屋里向去讨口水喝,歇歇脚。乡下个老农民侪客气非常,不收茶水铜钿,还为阿拉指路。就搿能歇歇停停、停停歇歇,阿拉凭着几只大饼几口水就踏进了苏州城。算了一算,从上海到苏州,踏了六、七个钟头个脚踏车。后来才晓得这条公路长100公里。刨去休息辰光,阿拉个平均车速为十六十七码。当夜,两个人露宿街头,向解放军学习了。
有了脚踏车,第二天阿拉两个畅游姑苏城。还辣虎丘山下拍了一张照片留下纪念。搿张黑白个小照片我已经寻勿到了。杨吕冰同学,侬还珍藏着吗?呒没再辣苏州过夜,第二天夜里又骑车狂奔,到第三天凌晨前,骑了脚踏车回到了上海。唯一对不起个是张先生,让伊为阿拉担心了好几天。此后个几年里,我又约了同学踏车子去过常熟、无锡甚至杭州。去杭州路长,用了两天。现在去杭州个天堂坐高铁,四十分钟。
我现在还骑一部永久牌脚踏车。新车。回头率瞎高。常常有人问我:“啥地方买个?我也想弄一部……”
扫一扫 关注微信“侬好上海”
新民网出品,学上海话,知上海事
回复文字 声音 听上海闲话
版权声明:
• 在本网站刊登的所有内容,包括但不限于文字、图片、音频视频、美术设计、程序及多媒体等信息,未经著作权人合法书面授权,不得进行一切形式的下载、转载或建立镜像。获得著作权人合法书面授权的,必须在授权范围内使用,使用时保留本网注明的“稿件来源”,并自负法律责任。凡注明为其他媒体来源,均为转载自其他媒体,转载并不代表本网赞同其观点,也不代表本网对其真实性负责。如果擅自篡改为“稿件来源:新民网”,本网将依法追究责任。
• 您若对稿件处理有任何疑问或质疑,请即与新民网联系,本网将迅速给您回应并做处理。
电话:021-52921234转641111 021-52921234转 新民网 传真:021-62677454
邮箱:稿件处理 处理时间:9:00—18:00