【闲画闲话】轧闹猛、轧煞老娘

　　文图/阿仁

　　北方话里讲个“热闹”，辣上海闲话里叫“闹猛”。北方人是看热闹、凑热闹。上海人要结棍得多，是轧进去、是轧闹猛。轧，挤也。老早上海个公交车、电车辣上下班辰光拥挤非常，因此上海人称坐公交车、乘电车为轧车子。上海最挤也就是最轧个地方勿是辣外滩、勿是辣城隍庙，而是辣车厢里。当时有统计讲，高峰时段车厢里一个平方要轧进四、五个人。人与人是前胸贴后背，大家难于动弹，大家看勿到自家个脚背。移步之际要用脚辣地浪探索一记，勿然人群里会有人叫喊：“喂喂！阿里一个朋友踏到我脚了，帮帮忙抬一抬！”

　　今年国庆节放长假，央视新闻选出两个关键词：一堵，二挤。出城堵、进城堵，高速公路堵、国道堵，景区堵、停车场堵。堵车已是节假日个风景线。再有一个就是挤了。人山人海处处可见。挤到啥个程度我早两年就体验过了。到黄山去白相，山上山下几乎呒没一块空地，人满为患。其闹猛个密度几乎等于侬轧进了人民广场个地铁站，人流来人流去。其闹猛个热度几乎等于侬轧进了城隍庙个小吃店，热气扑面而来。其噪声度几乎等于侬轧进了老早个马路小菜场，叫个喊个吵个闹个，震耳欲聋。上山被人推着上，只看前人个屁股。下山被人挤着下，只看前人个头顶心。凡是可以取景拍照个地方更是轧足势形，要留念只好拍集体照、全家福，把轧辣一道个毫不相干个朋友一并收入镜头。看山看景被看了人。听松涛听溪流声被听了南腔北调七十二家房客。白相变成了一点也勿好不白相。出门处处难，一点勿错。

　　旅游就是花了铜钿银子去吃苦受气，一点勿错个。

　　上海闲话里形容轧，有“轧足势形”一词。辞海版个《上海话大词典》有搿样个条目，为“轧足输赢，挤极了：今朝百货公司里真是~~~~。”我之所以认为亦可以写成“轧足势形”，是从轧、轧头势结棍而来。写写上海闲话与讲讲上海闲话并无高低深浅，记录上海闲话，写得出、看得懂、听得清，可以哉。阿拉小辰光有一个弄堂里小囡囡白相个游戏，叫“轧煞老娘”。把一个小朋友推到一只墙角落里，大家蜂拥而上，用劲朝角落里去推去挤去轧。大家还一道喊叫：“轧煞老娘、轧煞老娘、轧煞老娘有饭吃！”轧辣里向个呼爹喊娘，轧辣外面个呼天喊地。最后一哄而散。搿样个有点恶作剧个白相节目，上了点岁数个老上海人一定还能记得。

　　节假日一定闹猛。但好勿容易休息几天是否就要冲出门去轧闹猛，容大家三思。