【闲话闲画】城隍庙个老与新

　　文图/阿仁

　　老一点个上海滩———三四十年前头上海个商业区域号称三街一场：南京路、淮海路、四川路和豫园商场。不过豫园商场基本浪只是停辣纸面浪，到了上海人个嘴巴里，大家还是叫豫园商场为城隍庙、老城隍庙。就像西藏路、延安路口个大世界一样，大世界被改过好几趟名字了，解放初改为人民游乐场，十几年之后又被改为上海市青年宫。最后还是恢复了原名大世界。老名字长寿命。

　　上海城隍庙有历史，始建于1369年，供奉明初个泰裕伯为城隍老爷。历代多有毁修。现在个规模是80多年前黄金荣、张啸林、刘鸿生、杜月笙等地方大佬合捐银两五万圆重建个。五十年代后城隍庙大殿四周个一些道教楼房改作它用，城隍庙瘦身了。阿拉小辰光去城隍庙，大殿里除了端坐城隍老爷，还供奉着金山神、汉代名将霍光、吴淞战役死难守将陈化成。大殿一侧是星宿殿、阎王殿。阎王殿是让小小囡想去又不敢去个地方。牛头马面个差役凶神恶煞，下油锅、上夹棍、滚钉板的酷刑罗列殿上，吓煞人。不过伊个辰光去城隍庙倒勿是去烧香拜城隍，是为了饱饱口福，买点五香豆和梨膏糖回来。十年动乱，城隍庙也难逃厄运。大殿、中殿、后殿都变成了仓库。八十年代初大殿修整后又变成了工艺美术品商店。直到九十年代，城隍老爷才被请了回来享受善男信女个香火了。城隍庙、老城隍庙重新拨上海人叫得朗朗上口哉。

　　城隍庙里个对联蛮有意思个。庙门口，右书“为善必昌”。左书“为恶必亡”。正中悬一硕大算盘，上刻“不由人算”四个小字。霍光殿外个对联：“做个好人心正身安魂梦稳；行些善事天知地鉴鬼神钦”。城隍殿前，上联为：“祸福分明此地难通线索。”下联为：“善恶立判须知天道无私。”由此看来，时下个“苍蝇”与“老虎”们假使还敢踏进城隍庙，必定要吓个半死个。城隍庙里最闹猛个地方可以算是当中个甲子殿了，内中供奉着六十花甲转运星宿。每一个所属个生肖部由五位星辰老爷掌管着侬每一岁运势。大家转来寻去，告拜自家个幸运菩萨。城隍庙个门票十元一张，相比之下算便宜个了。

　　城隍庙小吃原来最有名气个就在庙门两厢。小笼包、生煎馒头、排骨年糕、大小馄饨、鸡鸭血汤、单档双档、酒酿圆子，一应俱全。现在搿些地方改为商店了。要想解馋就要到庙外个九曲桥一带去寻了。不过讲一句老实闲话，此地个城隍庙小吃味道大勿如前了。勿晓得是大家个口味吃刁了，还是质量确实下降了，难作结论。大家以为呢？