【闲话闲画】上街沿和下街沿

　　文图/阿仁

　　交通规则讲：“行人请走人行道。过马路请走横道线。”辣上海闲话里，人行道讲作上街沿，下街沿那就是马路浪了。从小辰光起就受到老师和爷娘个勿断教育，一到马路浪就晓得走路要走辣上街沿浪，穿马路要走横道线。辣呒没横道线个冷静小马路浪过马路，先朝左边看，再朝右边看，呒没车子来往，快一点穿过马路。搿是常识。大人还会关照，辣马路浪勿可以白相官兵捉强盗。太危险了。搿一条可以讲是禁令。

　　现在个上街沿是越来越闹猛了。人多勿讲，车子也越来越多。上街沿是停车场。除了规定可以停放脚踏车个区域之外，大家都来停车子。助动车、电瓶车、机器脚踏车、黄鱼车咾啥都来随意停放。更辣手个是小汽车、面包车、甚至大卡车也冲上了上街沿随便一停。有个汽车还勿是直停，就横辣街沿浪。尽管有警察来贴条子罚款罚分，但勿买账个朋友还交交关。搿还算是静态个，可以绕圈子让脱伊。更加危险个是现在脚踏车、助动车、电瓶车也开到了上街沿浪。迎面来个还可以事先预防，后面来个真是防也防勿牢。呼——一部助动车从身边擦过去！嗖——一部电瓶车悄声无息个从背后窜出去！吓煞老娘。我就辣上街沿拨后面杀出来个电瓶车撞翻过。闯祸个小青年是外地人，伊也跌脱一跤。伊马上爬起来扶我：“老爷爷，您老没受伤吗？”我呒没闲话。看伊还懂点礼貌，就放脱伊算了。

　　上街沿辣交关地方还变成了小菜场、商业街。各种各样个地摊，从吃个到用个到白相个都铺辣上街沿甚至下街沿。到了夜里向马路浪还冒出勿勿少少个大排档。摆过排档个街沿石浪油水溚溚滴，比大理石还容易叫人滑倒。走过搿样路段个老年人只好叹气：“作孽作孽！真是路也越来越难走哉！”

　　下街沿浪最危险个倒勿是辣大小汽车，而是交关非机动车个逆向行驶。侬辣小马路浪先左看再右看个穿马路办法勿灵光了。左面会有从右面踏过来脚踏车，右面会有从左面冲过来电瓶车。侬必须要像摇头风扇伊能介，勿停个左盼右顾、前望后看。我现在走马路个经验是：辣上街沿保持一直线，防止后面窜出车子。辣下街沿过马路要环视四周，警惕从根本上勿可能出来车子个方向撞出来一部飞车。整治交通个重点勿但是管牢机动车，还要管牢非机动车。对上街沿浪骑车个、对下街沿浪逆向个骑车人要重重处罚。一点勿要客气。起板20元，严重犯规个50元。人人可管，人人喊打。对死勿遵章个脚色还可以叫警察叔叔扣留伊。保障走路安全与行车安全一样重要。