【名人旧事】胡适学讲上海话

　　文/郭晔旻

　　胡适算啥地方人，讲起来是蛮复杂个。照出生地来讲，1891年12月17日胡适养辣川沙，应该算是上海浦东人。不过，伊4岁个辰光就回祖籍徽州绩溪上庄，进家塾读书，告咾一般性书浪侪讲胡适是绩溪人。等到伊长到14岁（1904年），与江冬秀订婚，到上海进梅溪学堂（今蓬莱路河南南路口）读书个辰光，上海闲话伊是听也听勿懂哉。

　　开学第一天，胡适着仔一件蓝呢夹袍、绛色呢大袖子褂去拜见教书先生，完全是一副徽州人个打扮。迭个辰光上海个学堂上课基本浪向侪是用上海闲话，但胡适对上海闲话已经彻底忘光光，告咾只好进低级个第五班。

　　为了适应学堂个教学搭仔生活，胡适一门心思要学好上海闲话。到底是读书胚子，只过了一个号头，上海闲话基本浪向呒没问题了。有一趟上课，先生照例用上海话讲《蒙学读本》。当讲到“传曰：二人同心，其利断金。同心之言，其臭如兰”个辰光，伊随口一句，迭个是《左传》浪个闲话。胡适辣海老家个辰光书已经读过交关，告咾晓得先生讲豁边了。伊走到先生台子旁边低声讲：先生，搿只“传曰”是《易经》个《系辞传》，勿是《左传》。先生立时三刻对伊刮目相看，继续问伊读书个情况，胡适侪用上海闲话回答。到仔末脚个辰光，先生拉牢胡适个手，打仔几只弯，下到底楼前厅，拿伊升到二班个课堂里。迭桩事体拨了少年胡适邪气大个自信，上海闲话越讲越来三，到伊考进中国公学辰光，已经讲得老像样了。

　　辣海胡适以后个写作搭仔谈话里向，经常会跳出几句上海闲话。譬如1959年初，胡适搭仔陈诚、蒋梦麟、王世杰辣海台湾各地白相了6天，拨人讽刺是“商山四皓”。胡适就讲，迭个是读书人个“错客”，还特为说明“错客”是上海闲话——“错客”又写成“促掐”，上海人侪晓得啥意思。可见，上海闲话对胡适个影响还是蛮大。年纪大个辰光，伊讲，徽州话是伊个第一语言，上海话是伊个第二语言，官话（普通话）是伊个第三语言，外加讲：“现在假使搭仔上海人蹲辣一道，听伊拉讲半个钟头闲话，我也可以讲得蛮来三了。”